.webp){kind=icon}
Аналитичкиот тим на „Блумберг Адрија“ очекува закрепнување на туристичката активност во 2022 година. Се проценува дека приходите ќе бидат на повисоко ниво во сите земји, освен во Босна и Херцеговина, која треба да остане на нивото од 2019 година. Од друга страна, се очекува забавување на растот во 2023 година, бидејќи борбата против инфлацијата ќе влијае на потрошувачката на странските туристи и на депресивно расположение на потрошувачите.
Во периодот од јуни до септември во тековната година, вкупниот број на пристигнувања и ноќевања на туристи во регионот Адрија покажува силен меѓугодишен раст. Меѓутоа, бројот на пристигнувања на туристи и натаму е пет отсто помал од рекордната 2019 година. Бројот на ноќевања е зголемен за 1,2 отсто, покажува анализата на нашиот аналитички тим.
„Намалените епидемиолошки мерки, амбиентот на висок економски раст, како и добрите показатели на пазарот на трудот, поволно се одразиле на туристичката активност во регионот, каде што се остварени 20 милиони пристигнувања и 107 милиони ноќевања“, рече првиот човек за макроекономија и анализа на пазарот на капитал во аналитичкиот тим Иван Одрчиќ.
Прочитајте повеќе: Туризам: Имаме најголем раст на додадена вредност по посетител
„На повисоките приходи влијаеле и инфлаторните ефекти“, истакна тој, како гостин на Блумберг Адрија ТВ.
„Хрватска, како туристичка сила во регионот, од странските туристи заработи вкупно 3,2 милијарди евра, односно повеќе од сите други земји заедно“, објаснува Одрчиќ.
Туризмот во текот на целата година, а особено во летните месеци, во просек генерира релативно високи стапки на додадена вредност за економиите во регионот. Неговото влијание врз вработувањето, инвестициите и производството на поврзани производи е доста значајно.
„Уделот на туризмот, според една непрецизна мерка - односно односот на приходите од странски туристи во однос на БДП - во првата половина од годината во регионот во просек изнесува околу пет отсто, при што во Хрватска околу 10,3 проценти, а во Северна Македонија околу 2,7 проценти“, вели аналитичарот.
Иако вкупниот приход е највисок во Хрватска, како што објаснува тој, гледано според приходите по поединечно пристигнување на странски туристи, таа е на дното на скалата, со просечен приход по странски турист во износ од 689 евра. „Тоа е карактеристика на масовниот туризам, и тоа во негативна смисла“, вели Одрчиќ.
Од друга страна, Северна Македонија успеала да заработи дури 1.543 евра по странски турист, имајќи секако предвид дека вкупниот број на туристи и вкупниот приход во земјата се многу помали.
Нашиот аналитички тим смета дека туристичката активност годинава е на ниво приближно на 2019 година. „Главната причина за добрите резултати оваа година доаѓа од оптимизмот на потрошувачите, кој значително се зголеми по долгиот период на придржување кон строгите епидемиолошки мерки, ограничувања на патувањата, акумулација на заштеди, односно придушена побарувачка воопшто“.
Исто така, според нашиот аналитички тим, зголемената туристичка потрошувачка им се припишува и на променетите навики, каде што одморот повеќе не се доживува како луксузно добро, туку сè повеќе како основна потреба.
„Следната година главните закани во туризмот доаѓаат од глобалното економско забавување, високите цени на енергијата, материјалите и работната сила, а најавите на многу хотели се дека нема да има претсезона, бидејќи многу ќе останат затворени поради високи трошоци, па затоа очекуваме забавување“, заклучи Одрчиќ.
