Министрите за внатрешни работи на земјите-членки на Европската унија (ЕУ) во Советот на Европската унија денеска едногласно го потврдија приемот на Хрватска во Шенген зоната, додека за Бугарија и Романија немаше консензус, соопштија дипломатски извори.
Од 1 јануари 2023 година, на Брегана, како и на преостанатите 73 гранични премини со Словенија и Унгарија, протокот на патници и стоки ќе продолжи непречен, без задржување и контрола на патните исправи.
Поради технички услови, слободното патување во Шенген зоната низ аеродромите ќе биде можно малку подоцна, односно од 26 март 2023 година. Причината за тоа е што на аеродромите во земјите од Шенген зоната потребно е да се сменат излезите на авионите кои пристигнуваат и полетуваат од Хрватска за да се одвојат патниците, односно да се насочат кон излезите без гранични контроли. Сегашното правило е дека овие промени се прават за време на сезонското движење на часовникот, односно во овој случај на 26 март следната година.
Хрватското членство во Шенген прво беше вклучено во пакетот за разгледување со другите две земји-членки на ЕУ - Романија и Бугарија, но денес само Хрватска доби зелено светло за пристапување во Шенген.
По неодамнешните шпекулации за плановите на Австрија да го блокира членството на Хрватска во Шенген, австрискиот министер за внатрешни работи Герхард Карнер појасни дека нивната загриженост за проширувањето на границите на Шенген е поврзана со илегалната миграција и барателите на азил во Австрија, каде притисокот не доаѓа од Хрватска. Тој рече дека само годинава во австрискиот град Градиче биле уапсени 74.291 мигрант.
Пристапувањето на Бугарија и Романија во Шенген првично беше оспорено во 2011 година од министрите за внатрешни работи на Холандија и Финска, што го продолжи нивното преиспитување за членство, одржано на 8 декември 2022 година, повеќе од една деценија. Иако Финците се откажаа од блокадата, Холанѓаните останаа упорни и во националниот парламент изгласаа резолуција со која побараа од холандскиот премиер Марк Руте владата да не го поддржува членството на Бугарија и Романија поради загриженоста за организираниот криминал и корупцијата во тие земји.
Иако Илва Јохансон, комесар за внатрешни работи, на прес-конференцијата одржана на 16 ноември изјави дека сите три членки на ЕУ – Хрватска, Бугарија и Романија заслужуваат еднаков европски третман, Бугарија и Романија, заедно со Кипар и Ирска, остануваат надвор од Шенген. Нов термин за разгледување на нивниот прием сè уште не е познат.
.webp){kind=icon}
