text size
Премиерот на Хрватска, Андреј Пленковиќ денеска најави казни за трговците кои нема да ги вратат старите цени што неоправдано ги покачија при конверзијата од куни во евра, откако еврото на 1 јануари стана официјална валута во таа земја.
Тој на седницата на Владата рече дека тоа се однесува на тие кои неоправдано ги зголемиле цените при претворањето во евра и со тоа ја намалиле куповната моќ на граѓаните и нанеле штета на стопанството со зголемување на и така високата инфлација.
Исто така тој најави дека надлежните служби ќе ја зајакнат контролата на цените и ги повика граѓаните да продолжат да ги пријавуваат тие кои не ја почитуваат владината одлука да ги вратат цените на нивото кое важеше до 31 декември.
Освен казните, премиерот најави и можност за укинување на субвенциите за производителите на енергија.
„Во криза важна е солидарноста и одговорноста и однесувањето кое не е профитерско“, рече Пленковиќ.
Помошникот на главниот државен инспектор Ведрана Филиповиќ Грчиќ рече дека инспекторите досега извршиле речиси 700 контроли, а во 178 констатирале неоправдано поскапување од 1 јануари.
Просечните поскапувања во продавниците се и до 13 проценти. Најголем пораст е забележан кај услужните дејности, а потоа во трговијата на мало, особено кај пекарските производи, кои поскапеа за 15 проценти, но некаде се забележани поскапување и до 30 проценти.
„Во продавниците, повеќе од 70 проценти од субјектите ги вратиле цените пред воведувањето на еврото. Кај фризерските услуги и услугите за нега на тело, цените во просек се зголемени за 20 проценти, а во некои случаи и за 50 проценти“, додаде Филиповиќ Грчиќ.
Висината на казните се движи од 1.000 до 26.000 евра.
.webp){kind=icon}
