.webp){kind=icon}
Соработката меѓу Северна Македонија и Србија е на највисоко ниво откога станавме независни држави, истакна денеска на прес-конференција премиерот Димитар Ковачевски, кој е во официјална посета на Белград.
Во Белград денеска беа потпишани меморандуми за соработка во областа на рударството и енергетиката, како и за подобар проток на лица и стоки и електронски систем за патарина, со што ќе се овозможи граѓаните на двете држави да можат да плаќаат патарина користејќи иста електронска картичка или електронски таг во двете земји.
Меморандумот за соработка во делот на енергетиката се однесува на гасниот интерконектор што ќе се гради меѓу Северна Македонија и Грција и кон кој, според денешните најави, ќе се приклучи и Србија.
Иницијативата „Отворен Балкан“, според српската премиерка, има придонес во подобрувањето на економските и политичките односи меѓу државите, а економските подобрувања се директна последица на оваа иницијатива.
Во текот на следниот месец треба да се усогласи и терминот за третата заедничка седница на двете влади што ќе се одржи во Србија.
Брнабиќ истакна дека Србија ја поддржува евроинтеграцијата на Македонија. Таа најави дека на 5 април ќе биде потпишан дополнет меморандум за соработка во евроинтеграциите меѓу Северна Македонија и Србија.
Официјалната посета на Белград, Ковачевски ја почна со средба со српскиот претседател Александар Вучиќ, на која беше оценето дека билатералните односи меѓу двете земји се карактеризираат со динамичен политички дијалог на високо ниво, економска соработка и трговска размена. Ковачевски и Вучиќ разговараа и за регионалните иницијативи што се можност за перспективи и уште поголемо унапредување на меѓусебната соработка.
Северна Македонија, Србија и Албанија, кои се дел од иницијативата „Отворен Балкан“, в недела ќе се претстават на заеднички штанд на најголемиот саем за вино во Италија.
