Ковачевски и Брнабиќ ги промовираа електронските патарини

Премиерите на Македонија и на Србија, Димитар Ковачевски и Ана Брнабиќ денеска на наплатната рампа Прешево го промовираа заедничкиот интегриран електронски систем за наплата на патарините што се спроведува како дел од иницијативата „Отворен Балкан“.

Овој систем ќе овозможи брзо поминување на патарините во двете земји, при што граѓаните кои веќе го користат М-таг системот ќе можат со регистрација во конкретниот систем инициран од „Отворен Балкан“ непречено, автоматски да ги поминуваат патарините во соседната држава.

Според премиерот Ковачевски, ова е најдобра потврда дека „Отворен Балкан“ е иницијатива која, како што рече, дава резултати, функционира и луѓето ја сакаат.

„За само три месеци српски и македонски инженери успеаја да го направат решението за единствена електронска наплата на патарината. До следниот петок ќе биде направено решението за товарен сообраќај“, рече тој.

Ковачевски ја истакна важноста на соработката со Србија во однос на размена на производи, услуги и работна сила и посочи дека во иднина ќе се работи токму на тоа.

„Ова е уште една потврда дека иницијативата работи токму на забрзување на протокот на луѓе, стоки и услуги и на капитал“, рече Ковачевски додавајќи дека има зголемување на трговијата меѓу двете земји.

Тој потсети дека бројот на туристи кои во текот на изминатите две години доаѓаа во нашата држава е за 500 проценти поголем од пред воспоставувањето на иницијативата „Отворен Балкан“.

„Она што следува е воспоставување на софтверското решение за непречена размена на работници, да може секој да дојде да се регистрира преку единствен софтвер и во Србија и во Северна Македонија и во Албанија без административни процедури кои денес траат по 3 месеци“, рече Ковачевски.

Премиерката на Србија, Брнабиќ, истакна дека целта на „Отворен Балкан“ е да се олесни животот на луѓето на овие простори и да се олесне трговијата, со што како што рече, ќе стекнеме повеќе богатство, но и да го подигне стандардот на граѓаните.

„Ова е таква иницијатива која што на најдобар можен начин го олеснува животот, патувањето и протокот на производи, рече таа, осврнувајќи се на досегашната соработка во рамките на „Отворен Балкан“,  рече Брнабиќ, додавајќи дека иницијативата навистина дала резултати.

Во Македонија, согласно податоците од ЈПДП од јуни годинава, има околу 20 илјади возила со инсталиран М-таг, додека во Србија повеќе од 500 илјади возила имаат инсталирано М-таг и сите тие ќе бидат во можност, со регистрација на заедничкиот интегриран електронски систем за наплата на патарините, да можат непречено да поминуваат на наплатните рампи кои што автоматски ќе го регистрираат нивниот таг.

Корисниците на електронскиот уред за наплата ќе можат да го користат постојниот „ЕНП“(ENP) уред со негова реконфигурација и регистрирање на својата платежна картичка на едно од продажните места. ЕНП уредот ќе биде поврзан со платежната картичка на корисникот, додека самиот корисникот ќе може да избере дали ќе наплатува средства во национална или во странска валута Единствениот систем на патарина ќе ја зголеми безбедноста во сообраќајот и ќе го намали метежот на автопатите, а новиот начин на плаќање на патарина треба да го растовари и протокот на возила на наплатните рампи.

Предност за граѓаните е што нема да чекаат во редици во шпицот на сезоната и што побрзо ќе стигнат до посакуваната дестинација.

Во моментов нема коментари за веста. Биди прв да коментира...

Остави коментар