.webp){kind=icon}
Управата за јавен долг при Министерството за финансии на Србија во текот на денот ќе ја организира првата од двете аукции на осумгодишни обврзници планирани за последниот квартал годинава, а вредноста на емисијата е 110 милијарди динари (околу 939 милиони евра).
„Со продажбата на оваа обврзница, Република Србија меѓу другото ќе обезбеди средства за поддршка на инфраструктурни проекти за специјализираниот светски саем ’Експо Белград 2027’, кој ќе се организира во главниот град во 2027 година“, се наведува во соопштението.
Минималниот износ на должнички хартии од вредност што може да ги купи едно правно или физичко лице на аукцијата е пет парчиња, додека максималната вредност на државните хартии од вредност што може да ги купи едно правно или физичко лице во фазата на аукција е 50 проценти од вкупниот обем на емисијата, односно обемот на аукцијата при повторното отворање, се додава во соопштението.
Покрај денешната аукција, на 5 декември ќе бидат понудени и записи со рок на достасување од осум години, а во соопштението се наведува дека и следната година ќе се организираат аукции на хартии со иста рочност.
Иако Србија во моментов нема осумгодишни обврзници, а аукции на слични хартии од вредност немало од 2010 година (податоци на веб-страницата на Управата за јавен долг се достапни до таа година), одлуката за издавање на долгот на точно осум години може да се објасни со динамиката на достасување.
Имено, по четири години достасувањата на обврзници во странска валута се на високи нивоа, во 2031 година, кога достасуваат осумгодишните обврзници, нема поголеми отплати на други долгови.
Според податоците собрани од „Блумберг“, ниту во 2032 година нема многу хартии од вредност што достасуваат, додека првите поголеми износи на странски долг достасуваат во 2033 година.
Покрај овие аукции, министерот за финансии Синиша Мали рече дека државата одлучила да го поддржи корпоративното задолжување преку „голем број“ корпоративни обврзници што ќе бидат издадени од почетокот на следната година, чии трошоци ќе ги преземе државата.
„Од 1 јануари 2024 година очекуваме издавање голем број корпоративни обврзници, а државата Србија ќе ја поддржи оваа иницијатива и ќе ги преземе трошоците за емитување“, рече министерот на седницата на Собранието на која беше објавен предлогот за буџетот на Србија за 2024 година. Тој додаде дека државата сака да ги поттикне компаниите да бараат нови извори на финансирање, а тоа да не се комерцијални банки.
