Конзум уште од неделава ќе почне со двојно прикажување на цените на производите и услугите, и на тој начин, и пред официјалната обврска за двојно прикажување на цените која стапува на сила на 05 септември, сите купувачи во нивните продавници ќе имаат увид во цените и во новата валута која Хрватска ја воведува на првиот ден од 2023 година, соопштија од Конзум.
„Сите производи во Конзум ќе имаат цена искажана во куни и во евра и износот на фиксниот курс кој изнесува 7,53450 куни за евро, а промената на сите етикети во повеќе од 600 продавници на Конзум ќе биде извршена до крајот на јули“, велат од таму.
Додаваат дека двојното прикажување на цените пред законската обврска е продолжување на политиката за отворен и транспарентен однос на компанијата кон купувачите.
„Секогаш настојуваме да бидеме отворени во се што работиме, па така и во ова предизвикувачко време на воведување на еврото. На време почнавме со подготовки и нашите вработени се подготвени да продолжат со сите фази на овие историски промени за да им помогнеме на купувачите полесно да се прилагодат на новата валута“, вели Зоран Митрески, претседател на Управата на Конзум.
Целиот процес на воведување на еврото во Хрватска е поделен во три фази и Конзум со своите активности ја следи секоја од нив, објаснуваат од таму. Првата се однесува на прикажувањето на двојните цени и курсот. Двојното прикажување ќе се одвива до 31 декември 2023 на сите производи, во сите продавници на Конзум, вклучително и на интернет.
Притоа цените во двете валути ќе бидат прикажувани низ целиот процес на избор и купување на производите – на полиците во продавниците, при онлајн купување, при потврда на нарачката и на издадените сметки.
Втората фаза ќе почне на 01 јануари 2023 со воведувањето на еврото, а важно е да се напомене дека во куни ќе може да сe купува до 14 јануари истата година, а кусурот ќе им биде враќан во евра.
Третата фаза се однесува на времето од 15 јануари 2023 кога еврото ќе стане единствена валута со која ќе може да се плаќа во продавниците на Конзум.
И DM почна со воведување двојно прикажување на цените, на нивната онлајн продавница и апликацијата за мобилни телефони цените се веќе прикажани и во евра и во куни, а во продавниците прикажувањето во двете валути ќе почне од понеделник, 18 јули. Во сите 168 продавници на ДМ најдоцна до 01 август сите цени ќе бидат прикажани и во куни и во евра, велат од компанијата.
„Со воведувањето на двојното прикажување на цените почнавме одма по дефинирањето на фискниот менувачки курс за уште еднаш да потврдиме дека темел на нашето делување е прилагодувањето кон потребите на купувачите“, вели Дарио Клемар од менаџментот на ДМ.
За пресметување на куните во евро се користи само фиксниот курс во целосен броен износ, а потоа тој износ се заокружува на две децимали со примена на математичкото правило на закружување, велат од таму.
.webp){kind=icon}