Доларот скокна откако новите извештаи за интензивирање на непријателствата на Блискиот Исток го намалија оптимизмот за потенцијалниот крај на конфликтот. Bloomberg Dollar Spot Index вчера порасна за дури 0,3 проценти на највисоко ниво од 13 април, пред да се намали. Сите валути во Групата 10 паднаа во однос на доларот, а новозеландскиот долар ги предводеше загубите. Растот на тензиите ги зголеми цените на нафтата, при што Брент накратко надмина 107 долари за барел.
Добро утро, ви пишува Владимир Николоски од дигиталната редкација на „Блумберг Адрија“. Подолу петте вести што ги издвоивме за почеток на денот.
Големите нафтени компании „победуваат“ во војната во Иран
Колку милијарди повеќе од лани е главното прашање што се поставува во исчекување на финансиските извештаи на големите нафтени компании за првиот квартал од 2026 година, кои треба да покажат како војната во Иран влијае врз профитот на таканаречените „биг оил“ (Big Oil). Причината е едноставна - прекинот на транспортот на нафта низ Ормускиот Теснец, низ кој вообичаено минува една петина од светската потрошувачка, ги ограничи понудата и редовното снабдување, што предизвика цената на нафтата од типот брент да се зголеми од околу 60 долари за барел на почетокот на годинава до врв од 118 долари за барел на крајот на март.
„Гардијан“ неодамна објави истражување според кое стоте најголеми нафтени и гасни компании во светот заработувале повеќе од 30 милиони долари секој час во првиот месец од американско-израелската војна во Иран. Според истражувањето, „Сауди Арамко“, „Газпром“ и „Ексон мобил“ се меѓу најголемите добитници. Во него се прогнозира дека ќе бидат потребни месеци за снабдувањето да се врати на нивоата пред војната и дека нафтените компании би заработиле 234 милијарди долари до крајот на годината ако цената на нафтата и понатаму биде во просек 100 долари.
Македонските камионџии губат тури, странци им го земаат бизнисот
Транспортниот сектор во Европа и на Западен Балкан влегува во вториот квартал од годината под силен притисок од повеќе страни - растечки трошоци, недостиг од возачи, административни ограничувања на границите и ослабена побарувачка за превоз. Податоците што на почетокот на април ги објави Меѓународната унија за патен транспорт (ИРУ) покажуваат дека европскиот патен товарен транспорт и натаму работи во услови на висока неизвесност, под влијание на нестабилните енергетски цени, инфлацијата, новите регулативи и слабата економска активност.
Во исто време цената на дизелот во Европската Унија, според податоци објавени во првата половина на април од „Евроњуз“, повикувајќи се на неделниот билтен на Европската комисија, останува значително повисока во споредба со крајот на февруари, а просечните нивоа во дел од земјите повторно се над две евра за литар. За сектор во кој горивото претставува еден од најголемите оперативни трошоци, секое поместување на цените веднаш се прелева врз профитабилноста.
„Мета“ ќе отпушти 10 проценти од вработените за да се зголеми ефикасноста
„Мета Платформс Инк.“ планира да отпушти 10 проценти од вработените, или приближно 8.000 работници, во обид да ја зголеми ефикасноста и да ги компензира своите големи трошоци за вештачка интелигенција. Компанијата го откри овој потег во меморандум испратен до вработените во четвртокот, велејќи дека отпуштањата ќе се случат на 20 мај. „Мета“, исто така, нема да вработува работници за 6.000 отворени работни места што планирала да ги пополни.
Намалувањата на работните места доаѓаат во време кога главниот извршен директор Марк Закерберг агресивно троши на таленти и инфраструктура потребни за развој на најсовремени производи за вештачка интелигенција, вклучувајќи големи јазични модели и чет-ботови. „Мета“ веќе проектираше рекордни капитални расходи оваа година и објави неколку договори од повеќе милијарди долари со партнери за вештачка интелигенција во последните неколку месеци. Вработените беа охрабрени да користат агенти за вештачка интелигенција интерно за да помогнат со пишување код и други задачи.
„Златната виза“ на Трамп од милион долари досега е доделена само на едно лице
Само едно лице досега е одобрено за програмата за виза „Златна картичка“ на Доналд Трамп, со која им се дава на странците престој во САД за надомест од милион долари, изјави во четврток министерот за трговија Хауард Лутник. Лутник не го откри идентитетот на апликантот на кој му е одобрена визата. Тој во сведочењето пред комисијата на Претставничкиот дом на САД рече дека апликациите за виза од „стотици“ други странци се во фаза на разгледување.
Апликантите мора да поминат низ „специјален ветинг“ и мора да платат надомест за обработка од 15.000 долари, рече тој. Администрацијата на Трамп почна да прифаќа апликации за виза во декември. Претседателот ја промовираше програмата за виза „Златна картичка“ како критичен начин за привлекување таленти во САД. Примателите на визи плаќаат милион долари за да добијат престој во САД. Министерството за внатрешна безбедност на САД не одговори веднаш на барањето за коментар.
„Гугл“ се соочува со притисок од ЕУ да го отвори „Андроид“ за конкурентите на „Џемини“
„Гугл“ се соочува со зголемен притисок од Европската Унија да ги укине бариерите за конкурентските асистенти за пребарување со вештачка интелигенција на „Андроид“ телефоните, што е ескалација за која американскиот гигант стравува дека би можела да ја загрози безбедноста и приватноста на корисниците. Регулаторните тела на ЕУ се подготвени да утврдат што треба да направи единицата на „Алфабет“ (Alphabet) за да им овозможи на „ЧетГПТ“ (ChatGPT) и „Клод“ (Claude) од „Антропик“ (Anthropic PBC) пристап до истите функции на „Андроид“ како оние што се достапни за „Џемини“ на „Гугл“, според луѓе запознаени со ова прашање. Луѓето додадоа дека наодите се сè уште во нацрт-форма и дека времето може да се промени.
Процедуралниот чекор е во рамките на Законот за дигитални пазари на блокот - кој утврдува низа правила што треба и не треба да се прави за големите технолошки компании и предизвика гнев кај Белата куќа и критики од претседателот Доналд Трамп како неправедно насочени кон американските компании. И Европската комисија и „Гугл“ одбија да коментираат. Иако претстојните наоди се на чекор од формална истрага, ЕУ има за цел да изврши притисок врз „Гугл“ да ги реинженерира своите услуги за да им овозможи на конкурентските компании пристап до клучните функции во оперативниот систем на „Андроид“.
.webp){kind=icon}
