Доналд Трамп, старо новиот претседател на САД го обележи викендов што измина со кадровските решенија, но и со заканато до земјите од БРИКС.
Тој на неговата социјална мрежа напишта дека ако земјите од БРИКС се обидат да се „дедоларизираат“, ќе им воведе санкции од 100 отсто. Истовремено, Трамп објави и дека го номинира својот сват за амбасадор во Франција. Свекорот на неговата ќерка претходно беше осуден на затворска казна, а Трамп го помилува во време на својот прв мандат.
Добро утро, ова се петте најважни вести за почеток на денот.
Меѓу најпрофитабилните бизниси, а каскаат со плати зад државниот сектор
Јавната администрација во секоја држава е во суштина сервис на граѓаните и на бизнисите, а нејзината улога за нормално функционирање на секоја економија и општество е секако исклучително важна. Македонија долго време се обидува да го реформира својот државен апарат со цел да биде поефикасен, а помалку да го чини државниот буџет, но сите обиди се некако јалови: не видовме ништо повеќе од стратегии, акциски планови, евалуации, па повторно стратегии, и така триесетина години во круг.
Главните причини за тоа ни се добропознати: ниту една влада не сака да го фати „жешкиот костен“ во рацете и да почне вистинска реформа на државната администрација, затоа што тоа подразбира и кратење на значителен број работни места. Па, кој би сакал да си „пука во нога“ и да ризикува веројатно сигурно губење на следните избори доколку ги почне болните резови во општеството. Наместо тоа, државните служби остануваат место за континуирано вработување на партиските кадри, односно преку непотизам, кронизам, корупција и клиентелизам голем број луѓе добиваат работна позиција што реално не ја заслужуваат, односно не се доволно квалификувани и компетентни за неа.
Дефицит до 3 отсто: Македонија до 2029 година ќе ги прекршува фискалните правила
Покривот се поправа кога времето е сончево за да не пропушта кога врне. По ова правило треба да се раководат владите кога станува збор за трошењето на јавните пари односно да трошат повеќе во услови на забавен економски раст и рецесија, а во подобри времиња да го држат буџетскиот дефицит околу нула или да остваруваат мал суфицит.
Но анализата покажува дека земјава не ги почитува правилата што сама си ги поставила со Законот за буџетите од 2022 година. Во членот 10 е наведено дека дефицитот на општата влада не смее да надмине три проценти од номиналниот БДП, вкупниот долг на општата влада не смее да надмине 60 проценти од номиналниот БДП, а гарантираниот долг не смее да надмине 15 проценти од номиналниот БДП.
Колку ќе плаќаме за струја по Нова година?
Регулаторната комисија за енергетика утре ќе соопшти колку ќе чини струјата за домаќинствата и компаниите кои се снабдуваат на регулираниот пазар.
Цената што АД ЕСМ ја понуди на последниот тендер на ЕВН Хоум изнесува 62 евра за мегават час. Оваа цена е за две евра повисока од цената што во моментов државната компанија ја наплатува од ЕВН.
Близу 1200 фирми не платиле ДДВ, УЈП најавува блокирање сметки
Даночните обврзници кои не го платиле долгот по основ на ДДВ за октомври годинава, веднаш да го сторат тоа, во спротивно ќе се соочат со опомени и блокирање на трансакциските сметки, предупреди Управата за јавни приходи.
„Согласно анализата, останатите 1,198 даночни обврзници кои не ја исполниле својата обврска, ги повикуваме да ја платат својата даночна обврска без одложување со вкупен износ од 758,6 милиони денари. За секој ден задоцнето плаќање, согласно законот ќе се пресметува камата од 0,03 отсто од преостанатиот долг“, соопшти Управата.
Колку сме потрошиле во угостителските објекти лани?
Во 2023 година за храна и пиење во угостителските објекти во земјава се слеале 182,7 милиони евра. Оваа сума е за над 10 милиони евра поголема во споредба со 2022 година.
Само за пијалаци лани сме потрошиле над 71 милион евра. Пиењето во угостителските објекти се намалило во однос на 2022 година, покажуваат податоците на Државниот завод за статистика објавени во Годишникот.
.webp){kind=icon}