Оваа 2024 година ја обележи изборна треска. Се гласаше во 40 земји, од Тајван до САД. Најважни избори, глобално, беа тие во САД. Во јануари во Белата куќа ќе се врати Доналд Трамп.
Клучен играч во новата администрација на Трамп ќе биде најбогатиот човек на светот, Илон Маск. Трамп ја уверува јавноста дека Маск нема да биде претседател на САД, туку само ќе се справува со прекубројната администрација и ќе се обиде да ја направи поефикасна.
А Маск, пак, откако ги освои вселената и власта, влегува во нови потфати, сега тргнува во поход кон Германија, каде што следната година ќе биде изборна. Оваа земја годинава стана „пациентот на Европа“. Во пресрет на изборите, јасно е дека таму ќе има нова влада, а анализите покажуваат дека веројатниот нов канцелар Мерц нема да може брзо да го најде лекот во услови кога земјата ја мачат низа структурни проблеми.
Прочитајте повеќе:
Енергетски ефикасни згради во Македонија: Колку струја може да се заштеди?
Пет скијачки дестинации што се поевтини од најпопуларните, а исто толку престижни
Избори имаше и во земјава и се случи промена на власта. Новата влада почна со нов, голем кредит од Унгарија. Парите од него уште не се распределени, а според експертите, ефектот врз БДП ќе биде мал.
Меѓу старите проблеми се високите цени. Новата влада се обидува со стара мерка, ограничување на маржите, да го заштити животниот стандард на населението. Тоа е особено важно во услови кога газдите не предвиделе повеќе пари за плати за следната година, а буџетот проектира дека растот на платите ќе забави.
Ќе забрза наплатата на надоместоци за искористувањето на природните ресурси. Министерството за енергетика им испрати честитка на компаниите, од 1 јануари ќе плаќаат двојно поголеми надоместоци затоа што досега, како што покажала споредбената анализа, плаќале најмали, а по овој основ во буџетот се слевале одвај 10 милиони евра.
Го анализиравме и пазарот на капитал. Кој купуваше, кој продаваше? Анализата покажа дека движењата кај нас во текот на 2024 година биле скромни, но глобално се поставува силна сцена за следната година.
Следната година од Скопје ќе се лета кон повеќе нови дестинации. Најново име на листата е Амстердам. Сѐ поизвесно е дека од Скопје ќе се стигнува побрзо до повеќе метрополи отколку од Ѓорче до Драчево затоа што градскиот превоз ќе остане проблем барем до следните локални избори в година.
Прочитајте повеќе:
Туризмот во Македонија може да живее само од археологија?
Странските туристи се враќаат, но сѐ пократко седат во Македонија
Нашите аналитичари прогнозираат дека американскиот Фед ќе продолжи со намалувањето на каматите и во текот на 2025 година. Паралелно, Федералните резерви ќе се соочат и со тужба од големите банки и деловните групации, кои сметаат дека институцијата го прекршила законот при спроведувањето на годишните стрес-тестови.
Нашиот аналитички тим ја скенираше состојбата на пазарот на стоки. Многу нешта ќе зависат од Трамп и од времето, се наведува во анализата.
Прочитајте повеќе:
„Енвидија“, „Спејс екс“, „Ново Нордиск“, „Епл“ - достигнувања во 2024 година
Берзанска ѕвезда: Eвропска акција поуспешна дури и од „Енвидија“
За гасот се прогнозира дека цените на европскиот пазар и во 2025 година ќе останат на ниво на просекот од годинава - околу 35 евра за мегават-час. Истовремено, Русија најавува дека има начини да ја снабдува Централна Европа и по истекот на договорот Киев-Москва, за кој е извесно дека нема да биде продолжен.
Во февруари 2025 година ќе се навршат точно три години од почетокот на руската инвазија врз Украина, судирот што ја предизвика најтешката енергетска криза во Европа, а потоа и силната инфлација. Трамп вети крај на војната, а „Блумберг“ анализираше зошто Украина се плаши од ветувањето на новиот американски претседател.
.webp){kind=icon}
