Америка повторно голема, втор дел - пет вести на денот

Доналд Трамп положи заклетва како 47-ми претседател на САД, почнувајќи уште еден турбулентен четиригодишен мандат со ветувањата дека „ќе ја направи Америка повторно голема“, уште еднаш.

„За граѓаните на Америка, 20 јануари 2025 година е Ден на ослободувањето“, порача Трамп во своето претседателско обраќање веднаш по церемонијата на заклетвата, која за првпат по 40 години беше поместена во затворен простор, во Капитол во Вашингтон.

Добро утро! Ова се петте вести што треба да ги знаете на почетокот од денот.

Светските сили во трка по ресурсите достапни со топењето на поларниот мраз

Додека изминатите години наивно ги гледавме трогателните говори во Обединетите нации (ОН), сведочевме на ратификацијата на Парискиот договор и се удиравме во нос со прикачените капачиња на пластичните шишиња, зад сцената очигледно се одвивала сосема спротивна приказна.

Лидерите на модерниот свет не само што не се посветиле искрено на запирање на глобалното затоплување туку, изгледа, тајно се радувале на тоа бидејќи може многу да профитираат од него.

Со доаѓањето на Трамп на власт, тоа стана очигледно бидејќи старо-новиот американски претседател никогаш не бил суптилен човек. И во својот прв мандат покажуваше интерес за присвојување на Гренланд, а откако беше избран по вторпат, агресивно започна со притисоци...

Зелениот водород може да го замени јагленот во РЕК Битола

Според плановите на земјава, до нулта емисија треба да стигнеме во 2050 година, но затворањето на рудниците на јаглен е планирано за значително порано. „Блумберг Адрија“ веќе пишуваше дека декарбонизацијата на сите сектори, енергетика, градежништво и транспорт, ќе се случи за 25 години, но рудниците на јаглен ќе бидат затворени во 2030 година.

Дотогаш се работи на планови за инвестиции со кои ќе треба да се замени употребата на јаглен, а група македонски ентузијасти веќе имаат проект.

Здружението „Зелени иноватори“ има разработено предлог-иницијатива според која зелениот водород може да го замени јагленот во термоцентралите.

Државата ја исплати еврообврзницата од 2018 година

Министерството за финансии соопшти дека во целост е исплатена еврообврзницата од 500 милиони евра земена во 2018 година. 

Средствата за сервисирање на оваа обврска беа обезбедени преку заем од унгарската „Експорт-импорт банка“, со камата од 3,25 проценти, рок на отплата 15 години, со вклучен грејс период од три години.

Македонија досега има издадено девет еврообврзници, од кои шест се веќе исплатени, а во наредните години достасуваат за отплата уште три еврообврзници, издадени во 2020, 2021 и 2023 година, во вкупен износ од 1,9 милијарда евра.

Расте бројот на летови во ЕУ, Амстердам е најпосакувана дестинација

Во 2024 година во ЕУ се регистрирани 6,7 милиони комерцијални лета, што е за 5,8 проценти повеќе во споредба со 2023 година, кога имаше 6,3 милиони такви летови, објави денеска „Евростат“. И покрај ова зголемување, бројот на летови остана под нивоата од пред пандемијата, кога во 2019 година изнесуваше седум милиони.

Најголем број на комерцијални летови во 2024 година е забележан во Амстердам, Холандија, каде што на аеродромот „Шипхол“ биле реализирани 484.000 комерцијални лета. Потоа следуваат аеродромот „Шарл де Гол“ во Париз, со 463.000 лета, и германскиот аеродром „Франкфурт на Мајна“, со 437.000 лета.

„Блумберг Адрија“ веќе информираше за тоа дека Амстердам, Барселона, Париз и Дубаи се само дел од дестинациите кон кои ќе може да се лета од скопскиот аеродром годинава.

Цената на кафето може да порасне до 25 отсто

Сортата арабика, која особено е почитувана од познавачите на еспресо, достигна речиси 3,5 долари за фунта во декември во Њујорк. Сепак, мелниците сè уште го продаваат своето кафе во супермаркет како да се цените на големо од околу 2,5 долара за фунта. 

Со оглед на доцнењето на корекцијата меѓу големопродажните и малопродажните цени, цената на вашата шолја утринско уживање може да се зголеми за најмалку 20-25 проценти во следните неколку месеци.

Во моментов доцнењето на корекцијата трае подолго од вообичаеното поради различни причини, вклучувајќи го и тоа што синџирите на супермаркети се воздржуваат од повисоки цени поради кризата со трошоците за живот. Но, разликата е толку голема што трговците со кафе велат е прашање кога, а не дали, ќе се зголемат малопродажните цени. Поточно, прашање е дали покачувањата ќе дојдат кон крајот на јануари или почетокот на февруари.