Расте бројот на летови во ЕУ, Амстердам е најпосакувана дестинација

Во 2024 година во ЕУ се регистрирани 6,7 милиони комерцијални лета, што е за 5,8 проценти повеќе во споредба со 2023 година, кога имаше 6,3 милиони такви летови, објави денеска „Евростат“. И покрај ова зголемување, бројот на летови остана под нивоата од пред пандемијата, кога во 2019 година изнесуваше седум милиони.

Нередовните комерцијални летови (чартер-летови и други специјални летови) сочинуваа 8,7 проценти од сите летови во 2024 година. Летните месеци (јуни, јули и август) забележаа најголем број на нередовни летови (10,3 отсто, 10,7 отсто, и 10,1 отсто, соодветно).

Број на регистрирани комерцијални летови во ЕУ по месеци Евростат

Амстердам е најфреквентниот аеродром

Најголем број на комерцијални летови во 2024 година е забележан во Амстердам, Холандија, каде што на аеродромот „Шифол“ биле реализирани 484.000 комерцијални лета. Потоа следуваат аеродромот „Шарл де Гол“ во Париз, со 463.000 лета, и германскиот аеродром „Франкфурт на Мајна“, со 437.000 лета.

„Блумберг Адрија“ веќе информира за тоа дека Амстердам, Барселона, Париз и Дубаи се само дел од дестинациите кон кои ќе може да се лета од скопскиот аеродром годинава.

Најфреквентни аеродроми во 2024 година Евростат

Меѓу десетте аеродроми со најголем број комерцијални летови се вброија и шпанските аеродроми во Мадрид и во Барселона, минхенскиот аеродром, италијанскиот „Фјумичино“ во Рим, атинскиот, виенскиот и аеродромот во Даблин, Ирска.

Притоа, од „Евростат“ истакнуваат дека меѓу аеродромите со најголем дел од нередовните летови се истакнуваат оние во Атина (5,5 проценти), Грција, во Виена (4,6 отсто), Австрија, и во Мадрид (4,5 отсто), Шпанија.