Очите на светот неделава беа свртени кон САД, каде што Доналд Трамп положи заклетва како 47. претседател на САД, почнувајќи уште еден турбулентен четиригодишен мандат со ветувањето дека „ќе ја направи Америка голема повторно“ уште еднаш. На големиот настан присуствуваше и македонскиот премиер Христијан Мицкоски, кој беше единствен политичар од регионот кој доби покана за инаугурацијата и за време на престојот во САД оствари средби со големи американски бизнисмени и претставници на новата администрација.
Карактеристично за почетокот на новиот мандат на Трамп беше што само што седна во претседателската фотеља потпиша десетици извршни наредби за кои претходно очигледно беше добро подготвен од своите најблиски соработници, меѓу кои и Илон Маск. Истовремено, тој и неговата сопруга Меланија промовираа сопствени мемекоини во знак на поддршка на криптовалутите, иако остана нејасно како новата администрација ќе ги исполни ветувањата САД да станат центар на крипто-светот. Трамп, силно застана и зад развојот на вештачката интелигенција.
Инаугурацијата на Трамп фрли сенка на почетокот на самитот на Светскиот економски форум во Давос, Швајцарија каде што бизнис елитата вообичаено дискутира за глобалната економија. Овој пат, една од главните теми во Давос беше токму реизборот на Трамп за претседател и дилемата како неговите протекционистички политики ќе влијаат врз светската трговија и воопшто врз глобалниот раст. Пред почетокот на самитот во Давос, од анкетите на Светскиот економски форум меѓу бизнис елитата испливаа песимизам за растот на светската економија и стравувања од војна.
Прочитајте повеќе:
Македонија на ниво на африкански Бенин и Албанија за нови задолжувања
Инаугурација: Свечениот настан на кој бизнис елитата ќе го устоличи Трамп 2.0
На домашен терен, Државниот завод за статистика соопшти дека просечната исплатена нето-плата во ноември минатата година изнесувала 41.999 денари. Според податоците, просечната нето-плата во ноември е за 9,5 отсто повисока на годишно ниво, иако реално е зголемена за пет отсто. Во однос на претходниот месец, просечната исплатена плата е намалена за 0,3 отсто. Процентуално нето-платата во ноември 2024 во однос на истиот месец од 2023 година најмногу пораснала во секторите уметност, забава и рекреација за 15,3 отсто, во транспорт и складирање за 12,7 отсто, во преработувачка индустрија за 11,2 отсто и во образование за 10,4 проценти.
Континуираниот раст на просечната плата во Македонија очигледно влијае на зголемување на штедните влогови. Новите податоци на Народната банка неделава покажаа дека во банките чуваме речиси 10 милијарди евра. Имено, вкупните депозити во македонските банки во декември достигнаа 600,3 милијарди денари (околу 9,7 милијарди евра)и раст на годишно ниво од 12,4 проценти, покажуваат новите податоци на Народната банка. Оттаму објаснуваат дека растот во поголем дел се должина зголемувањето на депозитите на „домаќинствата“, при раст и на депозитите на корпоративниот сектор. Од друга страна, состојбата на вкупните кредити во последниот месец од минатата година изнесува 494,4 милијарди денари (околу осум милијарди евра), што е годишно зголемување од 11,2 проценти.
Прочитајте повеќе:
Зелениот водород може да го замени јагленот во РЕК Битола
Климатските промени се многу реални, но се чини дека борбата против нив не е
Американските берзи деновиве позитивно реагираа на најавата на новата американска администрација дека „Софтбенк“ (Softbank), „Опен еј-ај“ (OpenAI) и „Оракл“ (Oracle) ќе формираат заедничка компанија за поддршка на развојот на вештачката интелигенција со 500 милијарди долари. Иако претседателот Доналд Трамп најави воведување царини од 10 проценти за кинескиот увоз почнувајќи од февруари, на финансиските пазари во Азија им олесна дека тие нема да бидат 60 проценти, како што првично најави новиот американски претседател.
На домашниот пазар на капитал, во првите три недели од јануари, индексот МБИ10 додаде уште 8,33 проценти и забележа подобар старт и од 2024 година, кога за истиот овој период индексот пораснал за само 2,52 проценти. Да не заборавиме дека Македонската берза урна неколку рекорди минатата година, а ако по утрото денот се познава, тогаш и во 2025 година инвеститорите може да очекуваат добри приноси.
Прочитајте повеќе:
Уриваме рекорди: Го „подновивме“ возниот парк со 41.000 половни автомобили
Во Македонија лани увезени 65 возила поскапи од 100.000 евра
Додека ние увезуваме „крш“ автомобили од Европа, светот е светлосни години понапред од нас. Добар пример за тоа неделава беше Австралија опен 2025, првиот гранслем-турнир на годината кој ги изненади љубителите на тенисот низ светот со воведување нови технологии што ги спојуваат спортот и дигиталните иновации. Главна атракција на годинашното издание се анимираните преноси на натпреварите, кои предизвикаа воодушевување, но и контроверзии меѓу обожавателите и критичарите. Истовремено, стигна веста дека „Опен еј-ај“ (OpenAI) се подготвува да лансира нов „агент“ со вештачка интелигенција (AI) наречен Оператор, кој може да користи компјутер за да извршува задачи во име на корисникот, меѓу кои пишување компјутерски код.
.webp){kind=icon}