Можеби малку ќе боли, ама ќе вреди за цената, напиша американскиот претседател Доналд Трмап на социјалните мрежи откако го исполни предизборното ветување и во саботата воведе царини кон Канада, Мексико и Кина. На неговиот потег веднаш реагираа канадските и мексиканските власти и најавија контра мерки од утре.
Трамп уште најави и дека „апсолутно“ ќе има царини и за земјите од ЕУ затоа што блокот применува нефер трговски практики кон САД. ЕУ најави „цврст“ одговор во таков случај.
Добро утро, ова се останатите пет вести кои се важни за почеток на денот
Домашни и странски „играчи“ заинтересирани за ЕТФ-ови во Македонија
Сѐ уште се крчка новата законска регулатива што ќе овозможи основање и работа на алтернативни инвестициски фондови во Македонија, освен постојните отворени и затворени фондови. Меѓу нив се и ЕТФ-овите (од англ. Exchange Traded Funds), односно фондови што на ист начин како и акциите од поединечни компании може да се тргуваат на берза.
Овие инвестициски фондови стануваат сѐ повеќе популарни меѓу инвеститорите низ светот, но и кај македонските физички и правни лица што тргуваат на светските берзи.
Преглед на берзите: Кинеската бура, величествените седум и танцот на централните банки
Имавме исклучително исполнета недела на берзите. Во понеделникот финансиските пазари беа зафатени од технолошка бура предизвикана од кинескиот стартап „Дипсик“ (DeepSeek).
„Падот во понеделникот беше резултат на „Дипсик“, ЛЛМ моделот кој беше објавен пред околу два месеци“, објаснува аналитичарот на „Сензал капитал“, Михаило Ѓурѓевиќ. Пред нешто повеќе од една недела, „Дипсик“ објави нов модел кој го надминува „Опен еј – ај“ (OpenAI) во голем број метрики.
Бизнис што носи профити за завидување
Градежните компании често влегуваат во конзорциуми со други градежни компании за да завршат градежен зафат што често ги надминува капацитетите на поединечна градежна компанија. На пример, неодамнешната вест дека хрватската градежна компанија „Инг град“ за првпат излегува на берзата за да собере дополнителни средства што ќе ѝ овозможат да ги прошири сопствените капацитети. Тоа значи дека потпирањето на соработката со други компании во индустријата би се намалило на пониско ниво.
Градежните компании се соочуваат со големи капитални инвестиции во опрема, што на почетокот може да биде преголем трошок. Поточно, во зависност од големината и бројот на проекти, во иднина ќе зависи и повратот на инвестицијата, односно профитабилноста на компаниите на краток рок ќе биде под притисок од почетните капитални расходи.
По замрзнувањето на проектите, не работи и веб-страницата на УСАИД
Веб-страницата на Американската агенција за меѓународен развој (УСАИД) во текот на викендот е офлајн бидејќи администрацијата на Трамп продолжува да ја разгледува иднината помошта на САД кон странство.
Овој потег уследи по извршната наредба на претседателот Доналд Трамп минатиот месец за запирање и ревизија на помошта од САД кон странство. Милијарди долари помош од САД, обично координирана од независна агенција, се замрзнати, а неколку високи функционери суспендирани.
Се зголемува капацитетот на ветерниот парк во Богданци
Ветерниот парк Богданци ќе добие уште четири турбини со што вкупната инсталирана моќност ќе се зголеми на околу 50 MW, обезбедувајќи дополнително годишно производство од 37 GWh.
Втората фаза на проектот за проширување на ветропаркот во Богданци е дел од пошироката стратегија на владата за зголемување на учеството на обновливите извори на енергија до 45 отсто од вкупното производство до 2030 година.
.webp){kind=icon}
