Европскиот совет за плаќања вчера ја прифати Македонија како 39. членка на Единствената област за плаќања во евра (СЕПА). Од членството се очекуваат бројни придобивки за нашите граѓани, компании, но и за економијата во целина. Пред сè, се очекуваат побрзи, побезбедни и поевтини прекугранични плаќања во евра.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги идзвоивме за почеток на денот.
Истражување на PwC: Спринтери и полжави меѓу македонските директори
Резултатите од 28-то годишно глобално истражување за извршни директори на ПВЦ (PricewaterhouseCoopers – PwC) покажуваат дека директорите во Македонија и регионот започнале со инвестиции во генеративна вештачка интелигенција, направиле одржливи инвестиции и почнале да преземаат акции за редефинирање на нивните бизнис модели. Сепак, не сите извршни директори се движат со исто темпо. Многумина сè уште се движат бавно, ограничени од сопствените лидерски размислувања и процеси кои резултираат со отпорност.
„Втората група има две опции: или да ги забрзаат своите напори за трансформација на бизнис моделите, операциите и стратегиите за да останат конкурентни и релевантни во пресрет на промените, или да го изберат поризичниот пат и да направат само мали приспособувања на нивните сегашни бизнис модели, надевајќи се дека мали промени ќе бидат доволни за да продолжат да постигнуваат успех,и покрај поголемите промени во економијата“, укажуваат од ПВЦ.
Конкуренцијата притиска: Банките во трка по клиенти
Намалени каматни стапки за новите кредити, ослободување од разни трошоци кај станбени кредити, фиксни каматни стапки за време на целиот период на отплата, одобрување кредити онлајн... се само дел од погодностите што ги нудат домашните банки во моментов во борбата за клиенти на пазарот. Откако Народната банка (НБРМ) почна да ја олабавува монетарната политика во септември 2024 година, деловните банки следствено почнаа да ги намалуваат каматните стапки за кредитите.
Па така, во јануари 2025 година просечната каматна стапка на вкупните кредити е намалена на месечно и на годишно ниво за 0,09 п.п. и 0,34 п.п., соодветно, и изнесува 5,21 проценти, според најновите податоци на НБРМ. Просечната каматна стапка на новоодобрените кредити во јануари оствари месечен раст од 0,28 п.п. и изнесува 4,70 проценти, при годишен пад од 0,52 п.п.
ЕЦБ ја намали клучната каматна стапка на 2,5 проценти
Европската централна банка (ЕЦБ) ја намали својата референтна каматна стапка за четвртина поен, на 2,5 проценти, поттикната од знаците дека инфлацијата се враќа на целта од два процента во слабата економија на еврозоната. Овој потег, кој беше нашироко очекуван, е шесто намалување на депозитната стапка на ЕЦБ откако централната банка започна да ги намалува трошоците за задолжување минатиот јуни, кога стапката изнесуваше рекордни 4 проценти како одговор на растечката инфлација.
Стапката сега е на најниско ниво од февруари 2023 година. Трговците очекуваат едно или две понатамошни намалувања од четвртина поен годинава, според нивото имплицирано од пазарите на свопови. Еврото порасна во однос на доларот по одлуката на ЕЦБ, зголемувајќи се за 0,3 проценти, на 1,082 долар.
„Блекрок“: Нема доволно биткоини дури и за милионерите!
„Ако секој милионер во САД побара од својот финансиски советник да му обезбеди еден биткоин, нема да има доволно“, напиша американскиот финансиски гигант „Блекрок“ (BlackRock) во својот најнов извештај за биткоинот. Целта на ова беше да се покаже колку малку биткоини се достапни на пазарот. Својствата на биткоинот, сега се потврдени и прифатени од една од најголемите финансиски компании во светот, „Блекрок“.
Страхиња Савиќ, раководител за податоци и аналитика на платформата за криптовалути FRNT, која се фокусира на институционалните клиенти, го коментираше извештајот во изјава за „Блумберг“. „Ова претставува значителен пресврт за форма на капитал што беше финансиско табу пред само една година“, напиша Савиќ.
САД ја притискаат Украина за брзо примирје заедно со договорот за минерали
На европските функционери им било кажано дека претседателот Доналд Трамп сака да го поврзе предложениот договор за минерали меѓу САД и Украина со барањата Киев да се обврзе на брз прекин на огнот со Русија, според луѓе запознаени со ова прашање. Вашингтон навести дека Трамп е подготвен да го финализира договорот за природните ресурси, кој беше во мирување по конфликтот во Овалната соба со Володимир Зеленски минатата недела, под услов украинскиот лидер да се согласи на опиплив пат за примирје и разговори со Москва, велат луѓето.
Тие дополнителни услови се главната причина поради која договорот за економска соработка се уште не е потпишан, и покрај јавните изјави и на Трамп и на Зеленски кои сугерираат дека се подготвени да преминат преку ова прашање, рекоа луѓето, кои зборуваа под услов да останат анонимни.
.webp){kind=icon}
