Кога земја како Обединетото кралство за одредени средства гарантира за нашата држава, тоа значи дека застанува зад нас и тоа е значаен поттик за политичко средување на состојбите, а и за економската активност, смета претседателот на Стопанската комора на Македонија, Бранко Азески. Сега, според Азески акцент треба да се стави и на капацитетот на државата да ги искористи парите понудени во согласност со гаранцијата, но и на капацитетот на домашните компании да се вклучат во инвестициските активности.
Добро утро, ова се останатите пет вести што се важни за почеток на денот.
Битка за податоци – Регионот Адрија во потрага по сопствена вештачка интелигенција
Центрите за податоци долго време се сметаа за ’рбет на информациската ера – заднината на дигиталниот свет што јавноста ретко ја забележува директно. Сепак, со доаѓањето на вештачката интелигенција, нивната улога се менува. Вештачката интелигенција не постои само во апстракцијата на алгоритмите – таа живее во челични куќишта, системи за ладење и километри оптички врски.
Секој напредок, од напредна дијагностика до генеративни модели, бара физичка основа: центри за податоци способни да обработуваат милијарди операции во реално време. Тие стануваат новата критична инфраструктура на државите – тивка, но клучна оска во борбата за дигитален суверенитет.
Семејни бизниси во Македонија: Најчесто се самофинансираат, нов капитал нема
Најголемите 500 семејни компании во светот имаат вкупни приходи што се исти како приходите што лани заедно ги оствариле двете економски најголеми земји, САД и Кина. Според најновиот извештај за 2025 година на „Ернст енд Јанг“ и Универзитетот во Сент Гален, Швајцарија, приходите на 500-те најголеми семејни фирми изнесуваат 8,8 трилиони американски долари и бележат раст од 10 отсто во однос на последниот извештај од 2023 година.
„Помладите“ семејни компании се соочуваат со сериозен предизвик – да ја преживеат транзицијата на управувањето. Истражувањата на „Ернст енд Јанг“ покажуваат дека една од клучните причини за ниските стапки на преживување на семејните бизниси е недостигот од јасна, долгорочна и структурирана стратегија за пренос на лидерството и сопственоста од една генерација на друга, вели во разговор за „Блумберг Адрија“ Радица Каширска Рунтевска, сопственичка на компанијата за консалтинг „Финовате“.
Нов сопственик, нова ера - Лука Дончиќ пред историски договор
Трансферот на Лука Дончиќ во Лос Анџелес Лејкерс на почетокот на 2025 година ја потресе НБА-лигата, но клучните одлуки за неговата иднина сè уште треба да се донесат. Навивачите трпеливо ја чекаат неговата одлука за продолжување на договорот, а во игра се неколку опции.
Словенечкиот интернационалец не може официјално да потпише нов договор пред 2 август, бидејќи тогаш истекуваат шест месеци од неговиот трансфер во Лејкерс. Според ЕСПН (ESPN), Дончиќ би можел да потпише четиригодишен договор вреден дури 229 милиони долари. Втората опција е двегодишен договор, што би му дало право на максимален петгодишен договор во 2028 година.
Може ли ракијата да стане отмен пијалак?
Ракијата е социјален феномен. Како аперитив или дигестив, обично ја консумираме во друштво и секогаш со добро мезе. Освен што ни го подобрува расположението, ракијата често и нѐ „лекува“. Таа ни помага за намалување на забоболка, со неа се масираме, ја користиме и за дезинфекција.
Во последно време ракијата е и голем бизнис. Многу винарници и дестилерии токму во неа гледаат шанса за деловен успех. За најпопуларниот алкохолен пијалак на Балканот неочекувано брзо расте интересот и на светскиот пазар, а пред неколку месеци дури се наметна и како глобална топ тема на Тикток.
Доларот ослабе поради гласините за смена на Пауел
Доларот ослабе поради шпекулации дека американските каматни стапки би можеле да бидат намалени порано и повеќе отколку што моментално очекуваат пазарите, откако американскиот претседател Доналд Трамп го засили притисокот врз претседателот на Федералните резерви (Фед), Џером Пауел.
Индексот на доларот на „Блумберг“ падна на најниско ниво во последниве три години, откако „Волстрит журнал“ (Wall Street Journal) објави дека Трамп би можел да посочи замена за Пауел веќе во септември или октомври. Трговците ја толкуваат оваа вест како знак дека е сè поверојатен раниот почеток на циклусот на намалување на каматите, бидејќи Трамп одамна бара намалување на трошоците за задолжување.
.webp){kind=icon}
Во моментов нема коментари за веста. Биди прв да коментира...