Инфлацијата во 2025 година изнесуваше 4,1 отсто, објави Државниот завод за статистика. Ваквиот податок ги надмина сите проекции за минатата година. Првично, беше планирано стапката на инфлација во целата 2025 година да изнесува 3 отсто, а потоа проекциите беа ревидирани на 3,9 отсто.
Добро утро, ова се петте вести што се важни за почеток на денот.
Јаглероден надоместок: Државата не се подготви, компаниите ќе плаќаат
И четири години по првата верзија на законот за климатска акција, ниту претходната ниту актуелната влада не го донесоа. А законот, еден од најважните од областа, беше потребен меѓу другото и за да го регулира јаглеродниот надоместок. Државата не успеа ниту да формира независно тело за верификација на емисиите.
На 1 јануари 2026 година заврши преодниот рок кој производителите на челик, железо, алуминиум, цемент, ѓубрива, водород и електрична енергија го имаа почнувајќи од октомври 2023 година. Во овој период тие имаа обврска да ги пријавуваат емисиите. Од 1 јануари освен што ги пријавуваат, тие и купуваат посебни CBAM сертификати (Carbon Border Adjustment Mechanism) .
Оваа година ќе покаже кој ја сфати одржливоста сериозно, а кој прерано ја отпиша
Во европски контекст, 2026. сè поретко се опишува како уште една „година на транзиција“, а сè почесто како момент во кој се подвлекува црта. По периодот на стратегии, ветувања и регулаторни најави, пред компаниите е година во која ќе стане јасно кои навистина ја вградија одржливоста во начинот на работење, а кои главно ја користеа како маркетиншка алатка.
Во анализите на експертите и медиумите кои ја следат одржливоста, сè почесто се повторува истата теза: фокусот се поместува од планирање кон способност за спроведување. Не затоа што целите исчезнале, туку затоа што просторот за нејасни одговори забрзано се намалува, пред сè поради комбинација од регулативи, пазарни притисоци и многу конкретни трошоци кои доаѓаат за наплата.
„Ролс-Ројс“: Фокус на уникатни модели за најбогатите додека побарувачката за ЕВ паѓа
Кога „Ролс-Ројс“ го лансираше „спектрe“ (Spectre) кон крајот на 2023 година, ултра-богатите купувачи на британскиот производител на автомобили брзо ја искористија можноста да го купат првиот електричен модел на брендот, кој нудеше тивко возење во споредба со бучавата на V12 моторот.
Две години подоцна, почетниот ентузијазам за моделот од 420.000 долари, кој може да забрза до 95 километри на час за 4,4 секунди, падна, а и продажбата се намали, што сугерира дека дури и милијардерите се двоумат кога станува збор за купување електрични возила. Се чини дека луксузниот бренд ќе го следи трендот на другите производители и ќе ги повлече претходните изјави за електричните возила до крајот на деценијата.
Акциите на европската воена индустрија растат заедно со апетитите на Трамп
Американската рација во Венецуела и тензиите околу плановите на Доналд Трамп за Гренланд го насочуваат вниманието кон глобалните воени трошоци, давајќи нов поттик на европските акции од одбранбената индустрија.
Индексот на европските одбранбени компании на Bloomberg пораснал за 10 отсто од почетокот на годината, добивајќи на замав по апсењето на претседателот Николас Мадуро од американската војска. Геополитиката е во центарот на вниманието на инвеститорите, бидејќи Трамп не го исклучува користењето воена сила за да го преземе Гренланд, што го ескалира конфликтот со Данска, сојузник во НАТО.
Тргување со страв: како експертите заработуваат кога пазарот е во паника
Кога 2025 година би требало да се опише со еден збор, за многу учесници на пазарите, без двоумење, тоа би бил – волатилност (мерка за тоа колку се варијабилни приносите на дадена хартија од вредност или пазарен индекс со текот на времето. На пазарите на хартии од вредност, волатилноста често се поврзува со големи ценовни осцилации, нагоре или надолу.
На пример, кога берзата расте и паѓа повеќе од 1 отсто во текот на подолг временски период, тоа се нарекува волатилен пазар). Геополитичките тензии, измешаните макроекономски сигнали, враќањето на политичката неизвесност во САД и високите вреднувања на компаниите создадоа средина во која наглите ценовни поместувања станаа нова нормалност.
.webp){kind=icon}
