Царинските политики на Доналд Трамп досега го доживеаја најсилниот политички удар, откако Претставничкиот дом, под водство на републиканците, усвои законодавство насочено кон укинување на претседателските царини за увоз од Канада. Овој развој доаѓа во момент кога Трамп, зад затворени врати, размислува за повлекување од Договорот за слободна трговија меѓу САД, Мексико и Канада (УСМЦА), трговски договор што го потпиша за време на својот прв мандат. Таков чекор дополнително би ги влошил трговските тензии во Северна Америка. Околу 80 отсто од стоката увезена од Канада ги исполнува условите од договорот и е изземена од царини.
Добро утро од дигиталната редакција на „Блумберг Адрија“. Во продолжение, и останатите пет вести што ги издвоивме за почеток на денот.
Повеќе болести и помалку деца - хемикалиите се главна закана за човештвото
Токсичните хемикалии се дел од екосистемите, вклучувајќи ги почвата, водата, воздухот и живите организми. Упорни супстанции како „вечните хемикалии“ (ПФАС - PFAS) се распространуваат преку воздухот, дождот, реките и подземните води и на тој начин се акумулираат во синџирите на исхрана и не дозволуваат чистење од нив во значителен обем, наведува најновиот извештај „Невидливи состојки“ на меѓународната организација „Системик“ (Systemiq).
Според извештајот, во ткивата на над 600 диви животни е потврдено дека има вечни хемикалии. Приближно 80 отсто од земјоделските почви на глобално ниво содржат остатоци од пестициди, а прекумерната употреба на пестициди предизвикува загуба врз земјоделските култури во вредност од 16 милијарди долари.
Како да пронајдете и препознаете добра „value“ акција?
На пазари полни со бучава, брзи наративи и краткорочни движења, фундаменталната анализа останува ретка константа. Додека цените на акциите се менуваат час во час, вистинската вредност на компанијата се менува многу побавно и токму во овој јаз се појавуваат можностите за инвестирање.
Разбирањето што го движи бизнисот, каде се генерира профитот и колку е одржлив на долг рок е клучот за одвојување на привремениот ентузијазам од реалната вредност и, секако, за долгорочен инвестициски хоризонт. Во оваа статија, претставуваме како да пронајдете и препознаете добра „value“ акција во неколку чекори.
НЛБ со помала добивка, што вели Блаж Бродњак за работењето?
Групацијата „НЛБ“ (NLB Group) лани оствари 1,3 милијарди евра нето-приходи, што е за пет отсто повеќе отколку претходната година. Од оваа сума, нето-приходите од камати изнесувале 947 милиони евра и биле за еден отсто повисоки отколку во 2024 година, додека приходите без камати се зголемиле за 16 отсто, на 356 милиони евра. Од нив, нето-приходите од провизии изнесувале 343 милиони евра и во период од една година се зголемиле за девет отсто, соопштија од банката.
Банката ги намали вкупните трошоци за девет отсто во споредба со претходната година, додека нето-добивката изнесуваше 503 милиони евра и е пониска за два отсто во однос на 2024 година. Притоа, добивката во последниот квартал, во споредба со претходниот, се намали од 131,6 на 97 милиони евра, што претставува пад од 26 отсто.
Ќе се врати ли доларот во Русија? Што му нуди Кремељ на Трамп во тајниот меморандум
Во интерен руски документ што го разгледал „Блумберг“ се наведува дека Кремељ изнел предлози со кои Русија повторно би го прифатила доларот како дел од широко економско партнерство со администрацијата на Трамп.
Во меморандумот изработен годинава, се прецизираат седум точки во кои, според Кремљ, руските и американските економски интереси би можеле да се усогласат по постигнување на договор за завршување на војната во Украина. Во документот се предвидува двете земји заеднички да ги промовираат фосилните горива наспроти позелените алтернативи, како и заеднички инвестиции во природен гас, нафта од офшор-наоѓалишта и критични суровини, со дополнителни придобивки за американските компании.
„Антропик“ обезбеди 30 милијарди долари нов капитал
„Антропик“ (Anthropic) го финализираше договорот за прибирање 30 милијарди долари од инвеститори, со што вредноста на компанијата е проценета на 380 милијарди долари, вклучително и новиот капитал. Со тоа дополнително се зацврстува позицијата на компанијата за вештачка интелигенција, која сѐ повеќе се приближува до ривалот „Опен еј-ај“ (OpenAI).
Најновата рунда на финансирање приближно го удвојува претходното вреднување на „Антропик“, со што компанијата станува една од највредните приватни компании во светот. Договорот следи само неколку месеци откако стартапот прибра 13 милијарди долари и доаѓа во исто време кога „Опен еј-ај“ има намера да обезбеди финансирање до 100 милијарди долари, бран активности што ја нагласува силната инвестициска трка за удел во водечките компании за вештачка интелигенција.
.webp){kind=icon}
