ЕЦБ треба да продолжи да ги зголемува каматите и следната година

Членот на Управниот совет на Европската централна банка (ЕЦБ), Мартинс Казакс, изјави дека зголемувањето на каматните стапки треба да продолжи и следната година - време кога економистите сè повеќе очекуваат дека еврозоната ќе биде среде рецесија.

Причината за долготрајниот цврст став, според летонскиот функционер, е дека високата инфлација веројатно ќе потрае и покрај падот. Тој поддржува зголемување од 75 базични поени овој месец и уште 50 или 75 на последниот состанок во декември, во зависност од податоците и изгледите за цените.

„Со оглед на тековниот тренд, не гледам потреба од пауза после тоа“, рече Казакс во интервју во Вашингтон. „Темпото може малку да се забави и би рекол дека почнуваме да користиме поширок сет на инструменти за да работиме низ целата крива на принос“, додаде тој.

Бидејќи трошоците за задолжување се зголемуваат по пауза од десетина години, некои функционери се залагаат за преиспитување на ситуацијата откако ќе се постигне неутрална стапка, која ниту ја стимулира, ниту ја кочи економијата. Но, со оглед дека таа точка - за која се смета дека е од 1,5 до два отсто - се очекува да се постигне пред крајот на годината, јастребите како Казакс веќе почнуваат да повикуваат на заострување на рестриктивната територија.

Гувернерот на белгиската централна банка, Пјер Вунш, минатата недела изјави дека каматна стапка од три отсто, во однос на сегашните 0,75 проценти, не е неразумна со оглед на изгледите за раст на потрошувачките цени кои се веќе пет пати повисоки од посакуваните два отсто. Неговиот холандски колега, Клас Нот, смета дека растот ќе продолжи и надвор од неутралното, иако со побавно темпо.

Во тоа време, монетарното затегнување ќе ги вклучи комерцијалните банки кои отплаќаат заеми од кризата познати како TLTRO, додека ЕЦБ, исто така, треба да започне да ги намалува приближно петте илјади милијарди евра од средствата што ги купи во минатите стимулации, според Казакс.

ЕЦБ собра илјадници милијарди преку програмата за купување средства / Bloomberg

Лансирањето на таканареченото квантитативно затегнување во 2023 година е популарно меѓу останатите јастреби.

„Ако работите само со камати, тогаш можете да ја израмните кривата на принос“, смета Казакс. „Едноставно не гледам потреба да се задржи тој поголем биланс. Дополнително, доколку ја заоструваме монетарната политика, потребно е и сите инструменти да бидат насочени во ист правец“, додава тој.

Важна лекција од пандемијата е дека монетарната политика била поефикасна кога „комбинирала и мешала различни инструменти“, според Казакс. Иако каматните стапки се „префериран“ инструмент на ЕЦБ, „треба да размислиме за користење на истата стратегија кога се движиме кон затегнување“, исто така земајќи ги предвид ризиците за финансиската стабилност, вели тој.

Со оглед на тоа што Меѓународниот монетарен фонд предвидува рецесија во еврозоната во втората половина на 2022 година, додека трае енергетската криза, Казакс ја признава опасноста од пад.

Економијата на еврозоната во 2023 година | Годишна промена на бруто домашниот производ / Bloomberg

„Многу е полесно да се пронајдат негативни шокови отколку позитивни шокови“, рече тој. „Ризиците очигледно се на долната страна за растот и на горната страна за инфлацијата“.

Производството во еврозоната ќе падне за 0,1 отсто во 2023 година, покажува најновото истражување на Bloomberg меѓу економистите. За Германија, најголемата економија во еврозоната, се очекува пад од 0,5 отсто, додека раст се очекува за Франција, Италија и Шпанија.

Казакс би бил „позитивно изненаден“ доколку новите проекции на ЕЦБ што треба да стигнат во декември не вклучуваат рецесија. Прашањето е само колку ќе биде длабока и долгорочна - и тоа ќе го обликува патот на монетарната политика.

„Мислам дека не треба да бидеме премногу загрижени за зголемување на стапките во овој момент. Но, колку повисоко се качуваме, толку повнимателни треба да бидеме во однос на големината на скалите“, посочува тој.

Во моментов нема коментари за веста. Биди прв да коментира...

Остави коментар