.webp){kind=icon}
Европската Унија (ЕУ) предложи користење на дури 40 милијарди евра од заедничката сметка на Унијата за помош на луѓе и компании кои се борат со високите цени предизвикани од енергетската криза.
Шефицата на Фондот на ЕУ за кохезија и реформи, Елиса Фереира, рече дека Европската комисија ќе им понуди на владите можност за користење на постоечкиот заеднички фонд за поддршка на малите и средни претпријатија кои се поголени од зголемувањето на цените на гасот и електричната енергија, како и помош преку националната програма за плаќање на сметките за енергија на загрозените домаќинства.
„Кохезиската политика не е европски инструмент за одговор на криза, но сепак мораме и на тој начин да реагираме кога граѓаните навистина се погодени“, рече Фереира денеска во Стразбур, додавајќи дека не можеле да ги занемарат потешкотиите со кои се соочуваат членките на Унијата, малите и средни претпријатија и семејствата поради моменталните високи цени на енергијата.
Според предлогот што Комисијата ќе го претстави во текот на денешниот ден, дел од пакетот треба да се намени за справување со високите трошоци за енергија поттикнати од руската инвазија врз Украина. Се очекува дека челниците на ЕУ ќе расправаат за новиот пакет мерки на самитот закажан за 20 и 21 октомври во Брисел.
Нови инструменти
Преку новите инструменти на земјите членки на ЕУ им се ставени на располагање повеќе од 500 милијарди евра за ублажување на влијанијата од енергетската криза врз потрошувачите и компаниите. Освен тоа, Комисијата и владите расправаа за новите инструменти за решавање на енергетската криза зашто не постои заеднички договор околу тоа како да се финансира новата потрошувачка.
Планот за користење на постоечкиот заеднички фонд би вклучил и обезбедување поддршка за пристапот на пазарот на работна сила, за зачувување на работните места на вработените и самовработените преку скратено работно време и други слични шеми, се наведува во нацрт предлогот кој уште е во работна верзија.
