.webp){kind=icon}
Особено задоволство ми е кога ветеното се реализира и има резултат. Во криза се важни пријателите, а ЕУ докажа дека има слух за нашите барања - да ни помогне кога е најпотребно, рече денеска премиерот Димитар Ковачевски на настанот по повод презентацијата на грантот од ЕУ за земјава, вреден 80 милиони евра.
Како што напомена Ковачевски, грантот е веќе достапен и овие средства се поддршка за субвенции на граѓаните за сметките за електрична енергија, поддршка за малите и средните претпријатија, за одржување на нивниот бизнис, како и за инвестиции на државата во енергетската транзиција, во обновливите извори и во енергетската ефикасност.
Во октомври лани, како што потсети премиерот, кога претседателката на Европската комисија, Урсула фон дер Лејен, беше во посета на нашата држава, порача дека ЕУ ќе биде покрај Северна Македонија и дека заедно ќе ги надминеме предизвиците од кризата.
„Го потпишавме договорот Фронтекс и Фон дер Лејен најави грант од 80 милиони евра. Овие средства се веќе достапни и ќе се користат како дел од пакетот антикризни мерки вредни над 760 милиони евра. Според Светската банка, ова е највисока буџетска поддршка во регионот за справување со кризата. За 2023 година во посебна програма се предвидени 225 милиони евра за справување со енергетската криза“, рече Ковачевски и дополни дека Владата во соработка со сите институции и ЕУ спречила ценовен шок, овозможила стабилно снабдување со електрична енергија, го зголемила домашното производство на струја, обезбедила стабилна цена и стабилизација на инфлацијата, која три месеци по ред паѓа.
Пред присутните се обрати и евроамбасадорот Дејвид Гир. Според него, овој настан уште еднаш покажува дека ЕУ ги исполнува ветувањата, дека солидарноста меѓу земјите-членки, сегашни и идни, е фундаментална и опиплива вредност.
„ЕУ ќе биде со Северна Македонија во време на криза, како што ќе биде и во градењето подобра иднина“, рече Гир, обраќајќи се на македонски јазик.
