.webp){kind=icon}
Превозната мрежа во Обединетото Кралство е отсечена со низа штрајкови од летово, додека работниците се борат за зголемување на платите соодветно на инфлацијата, а во некои случаи се противат на промените на системот по пандемијата на ковид.
Лондонските патници неделава издржаа уште еден штрајк на лондонската подземна железница, кој траеше од вчера до денеска наутро. Меѓутоа, некои штрајкови сепак се откажани поради надежите дека синдикатите и раководителите се приближуваат кон заеднички договор.
Синдикалните водачи информираат дека вработените во десетина компании во земјата ќе ја напуштат работната позиција на 26 ноември, вклучувајќи ги и тие што управуваат со главните услуги, како што се „Аванти вест коаст“ (Avanti West Coast), „Грејт вестерн реил“ (Great Western Rail) и ЛНЕР (LNER), како и „Лондон оверграунд“ (London Overground).
Прочитај повеќе
Рекордно висока инфлација на храната во Обединетото Кралство
Цените на прехранбенитe производи пораснаа за 14,7 проценти во последниот месец.
08.11.2022
Вработени на Хитроу најавуваат штрајк, неизвесни летовите за Мундијалот
Штрајкот почнува на 18 ноември, два дена пред почетокот на Светското првенство во фудбал
04.11.2022
И возачите на автобуси планираат да стапат во штрајк. Лондонските возачи на автобуси во „Абелио транспорт груп“ (Abellio Transport Group Ltd.) планираат да штрајкуваат десет дена во периодот пред празниците, што ќе влијае на услугите во големите делови од главниот град на Обединетото Кралство.
Што е спорно?
Главно станува збор за платите. Исто како работниците на пристаништата во Ливерпул, кои неделава си обезбедија зголемување на платите од девет отсто, така и транспортните работници сакаат зголемување колку и стапката на инфлација во Обединетото Кралство, која во последните месеци беше двоцифрена.
Од синдикатот што ги застапува возачите на автобуси велат дека компанијата на почетокот покажала волја да ги зголеми платите, но оттогаш не дала каква било понуда за вработените, а не започнала ниту какви било разговори.
Некои од најголемите синдикати во Обединетото Кралство, како РМТ (RMT) и ТССА (TSSA), ги прекинаа другите штрајкови на железничарите, кои требаше да започнат минатиот викенд, бидејќи влегоа во интензивни преговори за висината на платите.
Ќе има ли проблеми во авиосообраќајот во пресрет на Светското првенство во фудбал?
Хаосот на аеродромите попушти, решени се голем број работнички спорови и намалени се побарувањата за патување во однос на летната сезона. Сепак, англиските фудбалски навивачи што летаат за Катар на турнирот може да се соочат со прекини на работата на аеродромот „Хитроу“, откако синдикатите најавија штрајк од 18 ноември. Во акцијата ќе излезат околу 700 вработени во „Дната авиејшн сервисис“ (Dnata Aviation Services) и „Џон Мензиес“ (John Menzies Plc), кои нудат услуги за опслужување на авиокомпаниите на тло. Се очекуваат проблеми на терминалите два, три и четири на „Хитроу“, од каде што се одвиваат многу од летовите за Катар и другите дестинации во Персискиот Залив.
Проверките на пасошите, исто така, може да бидат погодени откако илјадници вработени во Министерството за внатрешни работи, вклучувајќи ги и граничните службеници, гласаа за поддршка на овие штрајкови. Датумите не се одредени, но националниот извршен одбор на синдикатот за јавни и комерцијални услуги планира да го стори тоа на 18 ноември, освен ако не се добијат значајни предлози. Државните службеници бараат зголемување на платите од 10 отсто и заштита на работните места.
