Инфлацијата во дневната трговија во супермаркетите достигна рекордно високо ниво во Обединетото Кралство, поради што на домаќинствата им станува тешко да имаат храна на масата. Цените на прехранбенитe производи пораснаа за 14,7 проценти во последниот месец, што е највисоко ниво откако аналитичката компанија „Кантар“ почна да ги следи податоците од 2008 година. Скокот на цените значи дека просечната годишна потрошувачка кошничка пораснала за 682 фунти (782 долара), а како што заладува времето потрошувачите сѐ повеќе се борат со растот на сметките за енергија.
Повеќе од четвртина од домаќинствата рекоа дека имаат финансиски тешкотии, двојно повеќе отколку што беше случај една година претходно, а многумина од нив велат дека зголемените цени на храната и пијалаците им претставува главна грижа. Купувачите даваат сѐ од себе за да заштедат пари на производите преку купување артикли од сопствени брендови на маркетите, како поевтина варијанта, и ги посетуваат поевтините синџири маркети.
„Јасно е колку инфлацијата во трговијата со мешана стока го погодува џебот на потрошувачите и ги зголемува нивните домашни грижи. Сега е прерано ова да се нарече врв на инфлацијата“, вели Фрејзер Меккевит, раководител на малопродажба во „Кантар“.
Продажбата на најевтините асортимани на сопствени марки во сите трговски синџири во Обединетото Кралство порасна за 42 процента. Сепак, попустите добиваат сѐ поголемо внимание, бидејќи купувачите се обидуваат да заштедат.
„Алди“, маркетот што во септември го зазеде местото на „Морисонс“ како четврти најголем синџир на супермаркети во Велика Британија, ја зголеми својата продажба речиси за 23 проценти во третото тримесечје. Продажбата на „Лидл“ порасна за 21,5 отсто. Поголемиот дел од другите трговски синџири забележа едноцифрен раст, додека „Морисон“ и „Веитроуз“, премиум-синџирите во сопственост на „Џон Левис партнершип“, забележаа пад на продажбата.
Трговците во малопродажбата се борат со големи трошоци за енергија и плати, при што мнозинството од нив ги зголеми платите на вработените барем еднаш во текот на оваа година. Како знак за притисок врз потрошувачите е тоа што малку луѓе ги полнат своите ормани со производи за Божиќ. „Минатата година во ова време два милиона купувачи веќе имале купено божиќен пудинг, додека оваа година таа бројка е за 32 процента помала“, наведува „Кантар“. Бројот на луѓе што користат банка за храна расте паралелно со растот на цените.
„Цените на храната се сериозна грижа, бидејќи милиони луѓе го прескокнуваат оброкот или се борат да стават здрав оброк на масата“, рече Сју Дејвис, раководителка за прехранбена политика, за весникот „Вич“ (Which).
.webp){kind=icon}
