Увоз на половни наспроти нови возила: Македонија близу до 4:1

За пет месеци од годинава се увезени близу 30.000 возила во земјава, покажуваат податоците на Царинската управа. Ваквата бројка упатува на тоа дека до крајот на 2025 година ќе биде урнат рекордот што беше поставен лани, кога за 12 месеци беа увезени близу 60.000 возила.

И годинава најмногу се увезуваат половни патнички автомобили. Од јануари до мај се увезени над 18.800 употребувани возила, а бројот на увезени нови автомобили се намалува.

Во текот на 2024 година, според Годишниот извештај на Министерството за внатрешни работи, во земјава биле регистрирани 5.510 нови возила, а 29.347 први регистрации се направени за половни возила.

Минатогодишната бројка за регистрирани нови возила е најниска во последните неколку години, а во однос на 2023 година падот изнесува околу 56 отсто.

Расте продажбата на нови возила, најмногу се купува „шкода“

Сепак, најновите податоци влеваат оптимизам дека состојбата се подобрува. Според податоците што ги собира австриско-унгарската компанија „Цеауто“ (CEauto GmbH), која се фокусира на истражување и анализа на автомобилската индустрија во Централна и Источна Европа, во мај годинава во споредба со истиот месец лани во Македонија биле регистрирани за 25 отсто повеќе нови патнички возила.

Статистиката на „Цеауто“ покажува дека кога купуваат нов автомобил, Македонците се одлучуваат за „шкода“. Овој бренд е убедливо најпродаван во земјава во текот на оваа и минатата година, а во мај биле регистрирани дури 127 нови „шкоди“.

Благо закрепнување во Европа

И европскиот пазар бележи закрепнување годинава. Податоците за мај покажуваат дека новите регистрации на автомобили се зголемиле за 1,9 отсто во однос на истиот период лани, достигнувајќи 1,11 милион единици, според податоците од Европската асоцијација на производители на автомобили

Овој напредок доаѓа во чувствителен период за индустријата. Европските производители на автомобили се соочуваат со слаба домашна побарувачка, зголемена конкуренција од кинески производители предводени од БЈД и политички притисок да ја продолжат трансформацијата кон почисти возила.

Најголемиот европски производител на автомобили, „Фолксваген“, и покрај проблемите со кои се соочува, во мај забележа умерен пораст на продажбата. Растот го поттикнаа неколку освежени верзии на автомобили, меѓу кои и новата „шкода“.

Кинеските производители уриваат рекорди

Кинескиот производител БЈД во јуни објави нов месечен рекорд. Автомобилскиот гигант минатиот месец продаде 377.628 патнички возила, вклучувајќи 206.884 електрични автомобили. Ова е за 11 отсто повеќе во споредба со истиот период лани, што помогна обемот на продажба во првата половина од годината да достигне 2,1 милиони единици, соопшти компанијата во вторникот.

Истовремено, конкурентот „Гили“ продаде повеќе од 193.000 автомобили во јуни, што претставува зголемување од 59 отсто во споредба со истиот период лани. Добрите резултатите го натераа менаџментот на компанијата да ја зголеми прогнозата на испораките во текот на 2025 година за 11 отсто.

Во моментов нема коментари за веста. Биди прв да коментира...

Остави коментар