Побавен раст на платите во еврозоната на крајот од 2023-та

Клучниот показател за платите во еврозоната паднал на крајот на минатата година - давајќи дополнителни аргументи на претставниците на Европската централна банка (ЕЦБ) кои сигнализираат дека би можеле да започнат со намалување на каматните стапки во јуни.

Надоместокот по вработен во четвртиот квартал пораснал со темпо од 4,6 отсто (на годишно ниво), што е пониско од 5,1 отсто во третиот квартал, покажаа податоците на ЕЦБ во петокот. 

ЕЦБ ги идентификува платите како клучен двигател на инфлацијата бидејќи растот на цените полека се приближува до целта на централната банка од два процента. Главниот економист Филип Лејн ја опиша компензацијата по вработен како „најсеопфатна мерка“ за растот на платите.

ЕЦБ очекуваше овој показател да се намали во четвртиот квартал и соопшти дека овој тренд најверојатно ќе продолжи. За потсетување, ЕЦБ неделава ја остави депозитната стапка непроменета, на четири отсто.

Индекс на раст на компензација по вработен Bloomberg

Оваа стапка, сепак, ќе остане „висока во споредба со историските нивоа поради сѐ уште добрата состојба на пазарот на трудот, инфлацијата и зголемувањето на минималните плати“, соопшти ЕЦБ. „Очекуваме дека на крајот на проекцискиот период таа ќе достигне три проценти, што во голема мера одговара на збирот на проектираниот раст на продуктивноста и инфлацијата“, се додава во соопштението.

„Растот на платите ја погодува желбата на ЕЦБ да ги намали каматните стапки, но Управниот совет сепак ќе сака да ги почека податоците од првиот квартал од оваа година пред да почне со намалувње“, велат Дејвид Пауел и Џејми Раш од „Блумберг економикс“.

Во моментов нема коментари за веста. Биди прв да коментира...

Остави коментар