.webp){kind=icon}
Во овие пазарни услови поверојатно е зголемување на цените на ресторанските услуги, не толку на хотелските, кога станува збор за угостителството. Ваков е ставот на Горјан Лазаров, главен извршен директор на чешкиот синџир на хотели „Ореа“.
„Ќе биде интересно да се следи развојот, бидејќи оваа рецесија е малку поинаква од претходните две на кои јас бев сведок во хотелиерството, затоа што тогаш патувањата беа први на листата за кратење кај луѓето. Сега гледаме малку поинаков однос, што можеби е резултат на ковид-кризата. Во оваа рецесија сега влегуваме со релативно ниска невработеност, бидејќи компаниите имаат проблем да најдат соодветен кадар, па можеби и поради тоа не ги кратат парите за патувања. Од друга страна, личната потрошувачка има влијание, зашто по ковид-кризата луѓето не го гледаат патувањето како луксуз, туку како составен дел од животот. Така што засега побарувачката кај хотелите не е значително намалена, напротив таа е зголемена, но очекувам дека 2023-та ќе биде турбулентна, ќе има одредено намалување на побарувачката и ќе треба да ја пребродиме“, вели Лазаров во разговор за Блумберг Адрија ТВ, кој очекува пад на цените во услови на рецесија и послаба побарувачка, но не во обем како и досега при вакви кризи на пазарот.
„Цените се формираат динамично. Во случај на пад на побарувачката, ќе дојде и до пад на цените, но во случајов, поради големите трошоци, тој пад на цените нема да биде толку голем“, вели Лазаров.
Според Горјан Лазаров, европските фирми имаат поголем проблем со цената на струјата за разлика од компаниите во регионот Адрија, поради поголемиот степен на регулација на пазарот на електрична енергија.
„Во овој дел од Европа главен проблем се цените на енергијата, додека во делот на регионот Адрија мислам дека има регулирани цени и тогаш ситуацијата може да биде поповолна. На пример, цените за енергија кај нас, во Чешка, од удел од пет отсто во 2019 година, сега се на некои 10 отсто од вкупните приходи. Ако ги видиме цените на берзата, сигурно е дека ќе видиме ново удвојување на овие трошоци во следната година, што е главната главоболка во овој период“, вели Лазаров.
Погледнете го видеото со целиот разговор на Блумберг Адрија ТВ со Горјан Лазаров, главен извршен директор на чешкиот синџир на хотели „Ореа“.
