.webp){kind=icon}
За две години цените во туристичкиот сектор скокнаа и до 40 отсто. Трката со инфлацијата продолжува, а зимава се очекува уште една помала нагорна корекција на цените, вели во интервју за „Блумберг Адрија“ претседателот на ХОТАМ, Крсте Блажески.
„Нормално беше по една таква криза цените да одат нагоре, новите цени се 'бркаат' со инфлацијата. Минатата година заврши, може да се каже, со минимално позитивни стапки, за разлика од претходни неколку критични години. Со оглед на сето тоа, туризмот мораше да ги покачи цените, не само на Балканот туку општо. За разлика од државите околу нас, цените се покачија во Македонија, но Македонија пак беше една од поевтините дестинации. Цените ќе одат нагоре, мора да ја следат инфлацијата, а колку побрзо забави тој раст на инфлацијата, се надеваме на забавување и смирување на растот на цените во хотелската индустрија. Во последните две години растот на цените беше од 30 до 40 отсто, за следната година мислам дека ќе има мали корекции до 10 отсто, едни работи ќе поскапат, други ќе поевтинат“, вели Блажески.
Минатата година главен предизвик беше енергетската криза, која ги натера хотелиерите да се осврнуваат кон зелени инвестиции. Сепак, според Блажески, скапите кредити го забавија тој тренд.
„Зелените инвестиции беа во полн ек лани, сега малку забави поради растот на каматите. Но, сепак, сè уште има некои евтини кредити од разни извори и бизнисите се осврнуваат кон фотонапонски централи. Се увиде дека имаме многу сончеви денови и добар процент од електричната енергија може да се замени. Сепак, секој вложува онолку колку што може“, вели претседателот на ХОТАМ.
Дополнителен проблем за работа е и дефицитот од работна сила, од кој особено е погоден туристичкиот сектор.
„Ова е проблем за цел Балкан и Европа. Има миграција на работната сила и голем број наши работници одат пред сè во Хрватска на пример, но и на други дестинации. Дел од решението е во увозот на работници. И покрај тоа што има некоја јазична бариера, сепак може да научат и да напредуваат. Квотите за дозволи за странски работници брзо се исполнуваат и се работи на нова квота што треба да се даде, бидејќи голем дел наши работници си одат. А без работници, знаеме дека нема бизнис, тоа е двигателот на сите компании. Досегашните искуства се добри, се потпишуваат на една или две години и досега добро функционира“, вели Блажески.
