.webp){kind=icon}
Членот на Управниот совет на Европската централна банка, Марио Сентено, рече дека економијата на еврозоната има подобри резултати отколку што многумина очекуваа во услови на рекордна инфлација и енергетската криза што избувна откако Русија ја нападна Украина.
„Економијата нè изненадува квартал по квартал. Четвртото тримесечје во Европа најверојатно ќе биде позитивно. Можеби ќе бидеме изненадени и во првата половина од годината“, рече тој на денешниот панел, организиран од Франсин Лаква од телевизијата „Блумберг“, на Светскиот економски форум во Давос.
Најголемиот знак за подобрување се случи минатата недела, кога Германија ги надмина предвидувањата за намалување на производството во последните три месеци од 2022 година. Најголемата европска економија сега може целосно да избегне рецесија, што ќе понуди надеж за дваесетчлената еврозона.
Сентено рече дека ЕЦБ ќе продолжи со својата битка против инфлацијата, борба што веќе го донесе најагресивниот период на затегнување на монетарната политика во историјата на институцијата.
