.webp){kind=icon}
Кредитната агенција „Мудис“ (Moody's) во вторникот објави дека Италија е единствената земја на која ѝ се заканува ризик да го загуби својот инвестициски статус.
Во извештајот за тоа како одредени земји во изминатите три децении се справувале со ситуацијата на губење на инвестицискиот рејтинг и транзицијата кон неинвестициска оценка, често наречена „ѓубре“, третата по големина европска економија е посочена како кандидат за ваков развој на настаните, иако „Мудис“ не соопшти колку е веројатно тоа.
Италија во моментов е единствената земја со рејтинг Baa3 и негативни изгледи.
„Слабиот раст и високите финансиски трошоци може дополнително да ја ослабат фискалната позиција на Италија“, се наведува во извештајот.
На 19 мај „Мудис“ треба да го објави следниот извештај за кредитниот рејтинг на Италија. Изгледите за сегашниот рејтинг се негативни од август минатата година.
Новата коалициска влада на премиерката Џорџија Мелони ја презеде функцијата пред шест месеци.
Минатата недела „Стандард и Пурс“ (Standard & Poor's) го потврди кредитниот рејтинг на Италија, кој е еден чекор повисок -BBB, со стабилни изгледи. „Фич“ (Fitch) има сличен став.
Според аналитичарите на „Мудис“, Италија има зголемен ризик од неуспех да ги спроведе реформите за заживување на потенцијалот за раст, како што е спроведувањето мерки поврзани со добивање пари од фондовите на Европската Унија за зајакнување на закрепнувањето и отпорноста.
Годинава разликата меѓу германските и италијанските обврзници е малку намалена, на 187 базични поени, од 250 базични поени на крајот од минатата година.
Движење на италијанскиот кредитен рејтинг од 2010 година / Bloomberg Mercury
Преместувањето на Италија во зоната на инвестициско „ѓубре“ сигурно ќе ја погоди тамошната економија и ќе ја одведе владата на Џорџија Мелони во досега неистражена територија.
Десничарската влада на Мелони досега беше претпазлива во своите потези за да не го потресе италијанскиот економски брод. Целта на тековниот буџет е намалување на дефицитот и јавниот долг, кој изнесува 140 отсто од бруто-домашниот производ.
Од 1995 година, 28 земји биле на работ да го изгубат својот инвестициски рејтинг кај „Мудис“. Од нив, 12 успеале да си го вратат статусот во период што варира меѓу три и 14 години.
„Стандард и Пурс“ минатата недела објави дека очекува јавниот долг на Италија да падне во следните три години, бидејќи економскиот раст ќе се засили следната година.
