.webp){kind=icon}
Европската централна банка (ЕЦБ) нема да се двоуми повторно да реагира со зголемување на референтната каматна стапка доколку податоците покажат дека истовремено има зголемување на маржите и платите во компаниите, изјави претседателката на банката Кристин Лагард.
Во интервју за францускиот регионален весник „Ла прованс“, Лагард рече дека нивната мисија за ставање на инфлацијата под контрола сè уште не е завршена. Сега се на потег компаниите - дали ќе се согласат да го намалат профитот за да ги компензираат платите на работниците или дали маржите и платите ќе се зголемат. „Истовременото зголемување би ги поттикнало инфлаторните ризици, но ние не би седеле со скрстени раце пред таквите ризици“, изјави Лагард.
Засега е сосема извесно дека каматната стапка ќе се зголеми за 25 базични поени, одлука што ќе треба да се донесе на состанокот на 27 јули. Официјалните лица дебатираат дали повторно да ги зголемат трошоците за задолжување на нивниот следен состанок во септември.
Оние што се залагаат за построга монетарна политика, како што е претседателот на „Бундесбанк“ (Bundesbank), Јоаким Нагел, веќе повикаа на повторно зголемување на референтната каматна стапка во септември. Додека, пак, извршниот директор на Банката на Италија, Игнацио Виско, еден од поблагите функционери во Европската централна банка, ги повика колегите да продолжат со претпазливост и ЕЦБ да има „симетричен став“.
