.webp){kind=icon}
Бројот на банкротирани компании во ЕУ се зголеми за 8,4 проценти во вториот квартал од годинава, што е највисоко ниво од почетокот на собирањето на податоците во 2015 година, соопшти „Евростат“. Оттаму додаваат дека бројот на банкротирани компании расте шест квартали по ред.
„Кај сите сектори на економијата е забележан пораст на бројот на банкроти во вториот квартал од 2023 година во однос на претходниот квартал“, информираат од „Евростат.
Најголем пораст на бројот на банкроти е забележан во секторите: услуги за сместување и храна (23,9 проценти), транспорт и складирање (15,2 проценти) и образование, здравство и социјални дејности (10,1 проценти).
Споредено со четвртиот квартал од 2019 година, пред пандемијата, бројот на прогласени банкроти во вториот квартал од 2023 година е поголем во повеќето сектори во економијата. Најголем пораст на бројот на банкроти, споредено со четвртиот квартал од 2019 година, е забележан кај услугите за сместување и храна (82,5 проценти) и превоз и складирање (56,7 проценти).
Спротивно на тоа, во вториот квартал од 2023 година само во два сектора во економијата има намалување на бројот на банкроти во однос на четвртиот квартал од 2019 година - индустрија (-11,5 проценти) и градежништво (-2,7 проценти).
Од „Евростат“ информираа и дека регистрациите на нови бизниси во второто тримесечје годинава се намалени за 0,6 проценти во однос на претходниот квартал.
