Лејн: Каматите ќе останат рестриктивни сè додека е потребно

Главниот економист на Европската централна банка (ЕЦБ), Филип Лејн, вели дека каматните стапки достигнале ниво од кое во одреден временски период би можеле да влијаат на намалување на инфлацијата до целта од два отсто. Сепак, оцената на официјалните лица за рестриктивноста на политиката ќе зависи од податоците.

„Со идните одлуки ќе обезбедиме клучните каматни стапки на ЕЦБ да останат рестриктивни онолку долго колку што е потребно“, рече Лејн во говорот во Њујорк. „Високото ниво на несигурност за основните анализи значи дека ќе бидеме зависни од податоците кога одлучуваме за соодветното ниво и времетраење на рестриктивната политика“.

На состанокот минатата недела ЕЦБ ги зголеми каматните стапки 10-ти пат по ред, а инвеститорите и економистите го протолкуваа овој потег како последен во кампањата за затегнување. Иако претседателката на централната банка Кристин Лагард се спротивстави на ваквите заклучоци, неколку нејзини колеги изјавија дека се надеваат дека им дојде крајот на покачувањата.

Најновото зголемување на стапката треба да ја заштити економијата од „шокови на раст“ на инфлацијата, рече Лејн на форумот на Универзитетот во Њујорк во четвртокот.

Говорејќи претходно во текот на неделата, гувернерот на Банката на Франција, Франсоа Вилерој де Галау, рече дека трошоците за кредитирање ќе останат на сегашното ниво од четири проценти „доволно долго“ за инфлацијата да се врати на два процента, цел што ЕЦБ прогнозира дека ќе биде постигната до 2025 година.

Ревидираните податоци за август покажуваат дека растот на цените е малку поумерен. Пазарите веќе очекуваат намалување на каматните стапки, со прогноза дека првото ќе биде во пролетта 2024 година  - порано отколку што најави ЕЦБ.

Лејн рече дека затегнувањето на монетарната политика води кон пад на деловните инвестиции и инвестициите во недвижности, но истакна дека „значителен дел од затегнувањето поврзано со претходните зголемувања допрва треба да се почувствува“.

Тој посочи дека при процената на инфлациските движења значајна улога ќе имаат податоците за платите и динамиката на профитот.

На прашањето дали официјалните лица ќе го забрзаат темпото со кое ги намалуваат своите биланси, Лејн рече дека не сака да шпекулира за идните промени во монетарната политика.

„Ако сакаме да ја заостриме политиката, најефективниот начин да го направиме тоа би било дополнително да ги зголемиме каматните стапки“, рече тој.

Во моментов нема коментари за веста. Биди прв да коментира...

Остави коментар