.webp){kind=icon}
Португалија планира да му стави крај на режимот што дозволува пониски даночни стапки за време од 10 години за т.н. непостојани жители, најави премиерот Антонио Коста.
„Овие мерки ќе завршат следната година, а ќе продолжат да важат само за оние што се веќе дел од програмата“, изјави Коста во интервју за „Си-ен-ен“.
Претходно годинава владата го одобри планот за ставање крај на т.н. златни визи за странци што купуваат недвижен имот во земјата во вредност од над 500 илјади евра, а целта е да се помогне во решавањето на проблемот со недостигот од станови по пристапни цени поради порастот на цените на недвижностите во една од најсиромашните западноевропски членки на Европската Унија.
„Нема смисла да се продолжи со таков даночен режим за непостојаните жители. Таа мерка порано имаше смисла, но нејзиното задржување би значело продолжување на даночната неправда, која повеќе нема основа, и е причина поради која цените на недвижниот имот растат. Цените што се постигнати не се одржливи“, објасни Коста.
Според податоците на Министерството за финансии, до јули годинава 89.000 лица биле опфатени со статусот на непостојани жители.
