.webp){kind=icon}
Германија прави сè што може за да ја поддржи својата проблематична економија, рече министерот за финансии Кристијан Линднер.
„Предвидувањата за судниот ден се несоодветни“, им рече Линднер на новинарите во петокот во Маракеш, каде што присуствува на годишните состаноци на Меѓународниот монетарен фонд. „Германија има огромен потенцијал за пресврт и цврсти економски основи и ние сме решени да ги зајакнеме тие основи“.
„Владините иницијативи вклучуваат привлекување поквалификувана работна сила, забрзување на процедурите за планирање и одобрување и намалување на бирократијата“, додаде тој.
Најголемата европска економија е под лупа откако не успеа да ја врати динамиката по рецесијата предизвикана од војната во Украина и зголемувањето на цените на енергијата. Според ММФ, тоа е единствената голема економија што ќе се намали оваа година.
Исто така се зголемија и сомнежите за нејзините долгорочни перспективи, бидејќи се соочува со стареење на работната сила, прекумерна зависност од трговските врски со Кина и потребата за брза транзиција кон обновлива енергија.
Неодамна „Бундесбанк“ ги истакна клучните предизвици од извештајот, во кој се заклучува дека „има широк притисок да се дејствува“, дури и ако политичарите веќе почнале да ги преземаат вистинските чекори.
Јоаким Нагел, кој ја предводи германската централна банка, на истиот настан рече дека економијата секако има потенцијал да ги достигне своите врсници и дека „не е пациентот на Европа“ - алудирајќи на називот што ѝ беше даден по повторното обединување.
Кристијан Севинг, кој ја предводи најголемата германска банка „Дојче банк“, го повтори истиот став.
„Потребни ни се структурни реформи околу цените на енергијата, инфраструктурата, имиграцијата и други работи“, изјави тој за телевизијата „Блумберг“. „Ако го направиме тоа, а тоа е она кон што треба да се стремиме заедно, економијата, но и владата, мислам дека Германија навистина повторно ќе доживее раст“.
Последните проекции на ММФ дека производството ќе падне за 0,5 отсто оваа година се повеќе или помалку во согласност со очекувањата на „Бундесбанк“, истакна тој, нагласувајќи ги тешкотиите со кои се соочува земјата поради енергетската криза што следуваше по руската инвазија на нејзиниот сосед.
Германското министерство за економија ги намали своите прогнози за земјата оваа недела, иако во петокот истакна дека има знаци на пресврт.
„Неодамнешните показатели на расположението, како што се ПМИ, процените на институтот ’Ифо’ и економските очекувања на центарот за европски економски истражувања ЗЕВ, иако од ниско ниво, сугерираат дека темпото на економски пад е забавено и дека умереното закрепнување веројатно ќе се случи на преминот од 2023 до 2024 година“, се наведува во месечниот извештај.
„Инфлацијата веројатно го надмина својот врв и треба да продолжи да забавува“, рече Нагел, иако Европската централна банка нема да запре додека растот на цените во 20-члената еврозона не се врати на целта од два отсто.
