.webp){kind=icon}
Претседателката на Европската централна банка Кристин Лагард ги повика лидерите на Европската унија да постигнат договор за нивните фискални правила пред крајот на годината.
Таа ја пренесе својата порака на денешниот самит во Брисел, само неколку дена откако им кажала на претседателите на Комисијата на ЕУ, на Еврогрупата и на Европскиот совет дека без договор се ризикуваат нови проблеми.
Обезбедувањето договор за спроведувањето на Пактот за стабилност и раст ќе биде важен сигнал за единство, рекла Лагард според официјален претставник запознаен со разговорот, посочувајќи дека рамката на блокот мора да промовира и одржливост на долгот и инвестиции.
Земјите на ЕУ се во расправија околу тоа како флексибилно да го спроведуваат фискалниот режим, кој вообичаено ги ограничува дефицитите на три проценти од бруто домашниот производ. Ваквите правила се суспендирани од почетокот на пандемијата, но треба да бидат вратени на почетокот на 2024 година.
Во разговорот на Лагард со шефицата на Комисијата Урсула фон дер Лајен, претседателот на Еврогрупата Паскал Доноху и шефот на Советот, Шарл Мишел на почетокот на неделава, таа предупредила дека непостигнувањето договор ќе изврши притисок врз монетарната политика да направи уште повеќе, според луѓе запознаени со ова прашање.
Доноху, кој ја предводи Еврогрупата министри за финансии одговорил дека влогот е навистина голем за да се постигне договор оваа година, и дека тоа е изводливо, но многу тешко.
Лагард присуствува на самитот во Брисел еден ден откако ЕЦБ ги остави каматните стапки непроменети за прв пат по повеќе од една година. Говорејќи по таа одлука, претседателката на ЕЦБ веќе им рече на новинарите дека „реформата на рамката за економско управување на ЕУ треба да биде завршена пред крајот на оваа година“.
