.webp){kind=icon}
Ризикот од рецесија во следните дванаесет месеци во Обединетото Кралство сега е 50-50, покажува истражување на Bloomberg, кое не дава оптимистички економски прогнози.
Иако официјалните проценки покажуваат дека Британија нема да забележи два последователни квартала негативен раст, економистите се крајно загрижени поради бранот на инфлација. Истражувањето на Bloomberg на оваа тема го извршија 13 аналитичари во јули, а 45 отсто од нив сметаат дека такво сценарио е можно во следната година. Тоа е три пати повеќе од цифрата што ја искажаа аналитичарите на почетокот на годината во истото истражување.
Бројките го покажуваат обемот на економскиот предизвик што ќе го чека наследникот на Борис Џонсон. Неговата одлука да замине минатата недела предизвика конкуренција во Конзервативната партија за престижната функција.
Инфлацијата е на највисоко ниво во последните четири децении, а зголемените трошоци на живот се извор на слабост за економијата. Засега, потенцијалните наследници на Џонсон зборуваат за намалување на даноците и намалување на државните трошоци за да им се допаднат на конзервативците.
Но, економската реалност наскоро би можела да ги надмине овие дискусии. Истражувањето на Bloomberg покажа дека просечните прогнози за раст, кои се намалуваат секој месец годинава, сега се на 3,4 отсто во 2022 година и 0,7 отсто во 2023 година. Тоа е далеку под стапката на инфлација што аналитичарите предвидуваат дека може да достигне 10 отсто во последниот квартал од оваа година. Овие бројки се над предвидените нивоа за Германија, Франција, Италија и Шпанија.
