Годишната стапка на инфлација во Европската Унија падна на 3,6 отсто во октомври од 4,9 отсто во септември, покажуваат најновите податоци на „Евростат“ објавени во петокот. Инфлацијата последен пат беше на сегашното ниво во септември 2021 година, пет месеци пред да започне рускиот напад врз Украина, што дополнително ја компликуваше и онака сложената глобална пандемиска макроекономија.
Со руската инвазија, цените на енергентите скокнаа нагло и високо, а токму цените на енергијата, кои паднаа за повеќе од десет отсто во однос на лани, се најзаслужни за дополнителното забавување на стапката на инфлација во октомври. Пред еден месец инфлацијата во Унијата првпат падна под пет проценти, откако во текот на летото се движеше околу шест проценти. Пред една година беше 11,5 отсто.
Како и во Хрватска, цените на услугите, храната и на пијалаците најмногу ја туркаат инфлацијата нагоре. Услугите поскапеле за 4,6 отсто за една година, а храната и пијалаците за 7,4 отсто, покажуваат податоците на „Евростат“.
Bloomberg Adria
Меѓу поединечните членки на Унијата, инфлацијата во моментов најмногу ги мачи жителите на Унгарија и на Чешка. Во соседна Унгарија цените во октомври биле во просек за 9,6 отсто повисоки од лани, а во Чешка за 9,5 отсто. Друштво во врвот им прават уште Романија, со раст од 8,3 отсто, и Словачка, со раст од 7,8 отсто, иако и Хрватска и Словенија не се далеку. Во Хрватска минатиот месец цените беа за 6,7 отсто повисоки од претходната година, а во Словенија за 6,6 отсто.
На другата страна на табелата, Белгија, Холандија и Данска имаат најниска стапка на инфлација, дури и под нулата. Во Белгија изнесуваше -1,7 отсто, во Холандија -1 отсто, а во Данска -0,4 отсто.
„Евростат“ посочува дека во однос на септември годишната инфлација опаднала во 22 земји членки, а пораснала во пет. Тоа се Чешка, Естонија, Грција, Шпанија и Шведска.
На месечно ниво, цените во октомври пораснаа за 0,1 отсто во Унијата, како и во еврозоната, која ги обединува членките со заедничка валута. Во октомври годишната стапка на инфлација во еврозоната уште повеќе се доближи до посакуваната вредност од околу два отсто, кон која се стреми Европската централна банка (ЕЦБ) со својата монетарна политика. Мерена со усогласениот индекс на потрошувачките цени изнесува 2,9 отсто, додека еден месец претходно беше 4,3 отсто.
Сепак, овој поостар пад на општата стапка сепак треба да се земе со резерва, бидејќи базичната инфлација - онаа каде цените на храната и енергијата не се вклучени во пресметката, а која ЕЦБ ја користи како главен репер, сè уште паѓа побавно. Во октомври таа изнесуваше 4,2 отсто, наспроти 4,5 отсто еден месец претходно.
.webp){kind=icon}
Во моментов нема коментари за веста. Биди прв да коментира...