Активноста на приватниот сектор во еврозоната и натаму паѓа, можна е рецесија

Активноста на приватниот сектор во еврозоната падна осми месец по ред во јануари, што укажува на слаб почеток на годината по веројатната рецесија во втората половина од минатата година.

Податоците од средата покажаа дека глобалниот индекс на менаџерите за набавки (PMI) на „Ес енд Пи глобал“ (S&P Global) порасна само маргинално на 47,9 поени, што е нешто помалку од 48, колку што предвидуваа аналитичарите. Од јули, ова е најблиску што дојде до 50, бројка што означува раст.

Малиот раст на PMI е резултат на напредокот во преработувачкиот сектор, додека пад е забележан кај услугите, спротивно на очекувањата на аналитичарите.

Овие бројки доаѓаат помалку од една недела пред новите податоци за економските перформанси во последниот квартал од минатата година, кои веројатно ќе покажат дека еврозоната е во рецесија. Иако, според ревизијата на претходните податоци, Германија веројатно досега избегнуваше рецесија, некои економисти предвидуваат дека тоа сепак ќе се случи на почетокот на годинава.

Јануарскиот индекс на менаџерите за набавки останува слаб и во Германија и во Франција, најголемите економии во еврозоната.

Податоците на „Ес енд Пи глобал“ јасно укажуваат дека ниту производството ниту услугите во овие две земји не се на нивоа што значат раст.

Активноста на приватниот сектор во еврозоната опаѓа во јануари Bloomberg Mercury

„Кога ги оценувате економските перформанси на Франција и на Германија, прашање е само кому му е потешко“, рече главниот економист на ХЦБ (Hamburg Commercial Bank), Сајрус де ла Рубија. Тој додаде дека производствениот сектор ја става Германија во нешто подобра позиција од Франција.

„Едно објаснување е дека надворешното опкружување, надвор од еврозоната, покажува знаци на подобрување, што ѝ дава на Германија, која има значителна извозна изложеност, релативна предност“, истакнува Де ла Рубија.

Во исто време, тој исто така гледа сè поголем проблем во услужниот сектор.

„Услужниот сектор не само што падна четврти месец по ред туку овој пад се забрза. Производствениот сектор останува во зоната на рецесија деветнаесетти месец по ред, но сегашниот пад е помал“, објаснува главниот економист во ХЦБ.

Според прелиминарните податоци, бруто-домашниот производ на Германија веројатно паднал за 0,3 отсто минатиот квартал.

„Ес енд Пи глобал“ наведува дека кризата во Црвено Море има негативни последици за синџирите на снабдување во производствениот сектор.

„Ефектот врз цените е ограничен бидејќи транспортните трошоци немаат доминантно влијание врз вкупните трошоци на стоките за широка потрошувачка што ја минуваат таа маршрута“, вели Де ла Рубија.

Ценовните притисоци остануваат високи и во Германија и во Франција, особено во услужниот сектор, каде што брзорастечките трошоци за работна сила играат особено голема улога.

Норман Либке, друг економист во ХЦБ, вели дека доказите сугерираат дека во Франција цените на инпутите се зголемиле поради повисоките плати, што ја објаснува загриженоста на лидерите на Европската централна банка за можното предвремено намалување на каматните стапки.

Податоците на PMI за САД и Обединетото Кралство ќе бидат објавени подоцна во текот на денот и се очекува дополнително да се зголемат како во Јапонија, за разлика од падот во Австралија.

За разлика од еврозоната, или дел од неа, земјите од регионот Адрија избегнаа рецесија, а аналитичарите на „Блумберг Адрија“ не ја ни очекуваат. Годинава очекуваат раст меѓу два и три проценти.

Во моментов нема коментари за веста. Биди прв да коментира...

Остави коментар