Казакс: ЕЦБ ќе почне да намалува во јуни, но треба внимателност

Сè погласни се очекувањата дека Европската централна банка (ЕЦБ) по речиси две години, на редовниот состанок во јуни ќе го заврши периодот на повисоки основни каматни стапки и ќе почне со намалувањето. Врз основа на податоците, тоа е сосема оправдано, а за таа тема се говореше и на конференцијата што Меѓународниот монетарен фонд (ММФ) ја организира заедно со Централната банка на Словенија.

Првите намалувања се „сосема веројатни“

Гувернерот на Банката на Летонија и член на Советот и на Проширениот совет на ЕЦБ, Мартиш Казакс, на прашањето од „Блумберг Адрија“ дали нешто може да го спречи намалувањето на основните каматни стапки што треба да се случи во јуни, претпазливо одговори дека сè уште е потребно да се почекаат податоците за мајската инфлација. Но, со оглед на моменталната ситуација, како што вели, „сосема е веројатно дека првите намалувања на каматните стапки ќе започнат во јуни“. Тоа, вели тој, ќе го отстрани тампонот против некои негативни сценарија што не се реализираа.

„Основното сценарио покажува дека постепено се приближуваме до нашата цел од два отсто, што секако ќе значи дека постепено можеме да започнеме и со намалување на стапките“, рече Казакс. „Овој процес треба да биде внимателен и постепен и не треба да брзаме“.

Bloomberg Mercury

Алфред Камер, директор на Европскиот оддел на Меѓународниот монетарен фонд, изјави за „Блумберг Адрија“ дека, врз основа на тековните податоци за инфлацијата, нивната препорака до ЕЦБ е јасна: „Во последната година гледаме јасно забавување на стапката на инфлација, кое беше помогнато со падот на цените на енергијата“. Затоа Камер очекува ЕЦБ да ја достигне целта од два отсто инфлација на почетокот на следната година. „Од јуни може да започне олабавувањето на рестриктивната монетарна политика“, се согласува тој со летонскиот гувернер.

Камер исто така смета дека се очекува намалување на каматните стапки за 25 базични поени следниот месец, по што ќе следуваат истите намалувања на квартална основа до септември 2025 година, кога каматните стапки би достигнале „неутрални 2,5 отсто“.