Инфлацијата во еврозоната забрза, предупредувајќи на претпазливост со стапките

Инфлацијата во еврозоната се зголеми повеќе од очекуваното, достигнувајќи ја целта на Европската централна банка (ЕЦБ) и зајакнувајќи ги аргументите за постепено намалување на каматните стапки.

Потрошувачките цени пораснаа за 2 отсто во октомври во споредба со претходната година, што е зголемување во однос на 1,7 отсто претходниот месец и надминување на процените на аналитичарите за зголемување од 1,9 отсто, соопшти „Евростат“ во четвртокот.

Помалото снижување на трошоците за енергија е главен двигател на ова зголемување. Основната инфлација, која ги исклучува нестабилните ставки, неочекувано остана стабилна на 2,7 отсто, додека зголемувањата на цените на храната беа побрзи.

Овие бројки ќе ги поддржат оние официјални лица на ЕЦБ што предупредуваа против прекумерни намалувања на каматните стапки за да се поддржи слабата економија на регионот. Инвеститорите веќе ги намалија облозите за поголемо намалување на каматните стапки до крајот на 2024 година, откако податоците за растот во средата покажаа дека блокот е на посилна основа, додека Германија избегна рецесија.

Bloomberg

Дебатата меѓу креаторите на политики за патот напред се интензивира во последните денови. Неколкумина минатата недела тврдеа дека треба да се разгледа намалување од половина поен на 12 декември, откако деловните анкети укажаа на влошување на замавот во приватниот сектор.

Други се спротивставија. Во средата членката на Извршниот одбор на ЕЦБ, Изабел Шнабел, рече дека „постепен“ пристап кон монетарното олеснување останува соодветен, додека претседателот на „Бундесбанк“, Јоаким Нагел, рече дека официјалните лица не треба да брзаат со понатамошни чекори.

Забелешките на Нагел следуваа по веста за многу поголем скок од очекуваното во германската инфлација месецов. Таа достигна 2,4 отсто од 1,8 отсто во септември - посочувајќи дека предизвиците остануваат.

„Целта е на повидок, но нема да ви кажам дека инфлацијата е под контрола“, наведе претседателката Кристин Лагард во интервју за „Ле монд“ (Le Monde) објавено во четвртокот. „Исто така знаеме дека инфлацијата ќе се зголеми во наредните месеци, едноставно поради базичните ефекти“.

Постојат и други опасности. Војните на Блискиот Исток и во Украина би можеле да ги зголемат трошоците за енергија и за транспорт. Потоа, тука е потенцијалното враќање на Доналд Трамп - со драстичен пакет трговски тарифи - во Белата куќа.

Во Европа, пак, зголемувањето на платите ја поттикнува инфлацијата во секторот услуги. Растот на цените во тој дел од економијата остана непроменет во октомври на 3,9 отсто.

Што вели „Блумберг економикс“ (Bloomberg Economics)… 

„Нашиот основен став останува дека ЕЦБ ќе направи уште едно намалување на каматната стапка во декември, намалувајќи ја депозитната стапка на 3 отсто. Потоа очекуваме да усвои квартален ритам додека креаторите на политиките го трасираат патот до неутралност. Пазарите ги ценат последователните намалувања во следната година и терминална стапка околу два отсто“.

- Џејми Раш, главен економист за Европа

ЕЦБ го зголеми темпото на олеснување месецов бидејќи податоците укажаа на помек економски раст и побавна инфлација. Во четвртокот Фабио Панета од Италија предупреди на ризикот дека растот на цените ќе биде под два отсто.

„Монетарните услови сè уште се строги и ќе бидат потребни нови намалувања“, рече тој. „Како што инфлацијата се намалува, нашиот фокус треба да биде на слабоста на реалната економија: Без одржливо закрепнување, инфлацијата ризикува да биде многу под целта“.

Но додека трошоците за енергија дејствуваат како пречка во последно време, официјалните лица очекуваат да ја постигнат целта дури следната година. Дел од причината за тоа е отпорноста на пазарот на трудот во еврозоната, со одделни податоци од четвртокот што покажуваат дека стапката на невработеност паднала на рекордно ниско ниво од 6,3 отсто во октомври.

Во моментов нема коментари за веста. Биди прв да коментира...

Остави коментар