Економијата на еврозоната порасна посилно од очекуваното во третиот квартал - дури и Германија ја избегна рецесијата што многумина ја предвидуваа.
Растот во валутниот блок од 20 земји се забрза на 0,4 отсто, додека економистите предвидуваа дека ќе остане стабилен на 0,2 отсто, бидејќи замавот во Франција се забрза и остана силен во Шпанија. Неочекуваното зголемување на бруто-домашниот производ (БДП) на Германија од 0,2 отсто ги изненади аналитичарите, иако податоците за претходните три месеци беа остро ревидирани надолу.
Слаба точка беше Италија, каде што производството неочекувано беше рамно, оптоварено од негативниот придонес од нето-трговијата.
На фронтот на инфлацијата одделни податоци од Шпанија покажаа дека растот на потрошувачките цени се забрза малку, на 1,8 отсто, но остана во рамките на целта на Европската централна банка (ЕЦБ) од 2 отсто. Германските податоци што треба да бидат објавени подоцна денеска веројатно исто така ќе покажат зголемување, а бројките за целата еврозона се закажани за четврток.
Податоците од средата може да ублажат некои од грижите за економијата на Европа што беа изразени минатата недела кога финансиските службеници се собраа во Вашингтон за состаноците на Меѓународниот монетарен фонд (ММФ). Неколку креатори на политики на ЕЦБ тврдеа дека влошувањето на перспективите може да бара поголеми намалувања на каматните стапки, додека други повикаа на претпазливост.
Растот во еврозоната се покажа изненадувачки силен во третиот квартал
Bloomberg
Неочекувано силните бројки на раст може да ги поддржат аргументите за одржување постепено темпо на олеснување и придржување кон традиционалните намалувања на трошоците за задолжување од четвртина поен. Трговците ги ревидираа облозите за намалувањата на стапките од страна на ЕЦБ по објавувањето на податоците, давајќи околу 25 отсто шанси за намалување од половина поен во декември. Претходно месецов имплицитната веројатност беше 50 отсто.
Најголемите грижи се фокусираа на Германија, чиј производствен сектор се бори со губење на конкурентноста, што извршните директори го припишуваат на високите трошоци за енергија, прекумерната регулација и недостигот од квалификуван кадар. Несигурноста ги натера потрошувачите повеќе да штедат наместо да ги трошат зголемувањата на платите што ги добија во последните месеци.
Сепак, тоа може да почне да се менува, со оглед на тоа што статистичката канцеларија на земјата ја истакна повисоката потрошувачка на домаќинствата и на владата како причина за растот во третиот квартал.
Неуспехот на Германија да го одржи замавот, пак, има сè поголемо влијание врз нејзиниот пазар на трудот, кој долго време остана отпорен. Невработеноста се зголеми за 27.000 во октомври, додека економистите очекуваа зголемување од само 15.000. Стапката на невработеност остана на 6,1 отсто.
Земјите со поголем фокус на услугите во последно време покажаа подобри резултати. Во октомври производството во приватниот сектор дури се зголеми со побрзо темпо надвор од Франција и од Германија, според деловните анкети на „Ес енд Пи глобал“ (S&P Global).
Олимписките игри привремено ѝ овозможија на Франција да ги прикрие основните слабости што тежат врз финансиската состојба на земјата. Како и во Шпанија, потрошувачката на домаќинствата и јавната потрошувачка беа главните двигатели.
Австрија оствари раст од 0,3 отсто, што е најмногу во последните две години, помогнат од закрепнувањето на потрошувачката, додека растот на БДП на Португалија и на Литванија се забрза.
Економското подобрување на Франција нуди олеснувања за владата, која се соочува со зголемени буџетски дефицити што ја поткопуваат довербата на инвеститорите. Со трошоци за задолжување повисоки во однос на европските колеги, премиерот Мишел Барние се обидува во парламентот да протурка непопуларни кратења на трошоците и зголемувања на даноците, иако нема мнозинство.
Што вели „Блумберг економикс“ (Bloomberg Economics)…
„Неочекуваниот раст на БДП во третиот квартал не ја менува нашата процена дека германската економија се бори да се стабилизира и 2024 година ќе биде уште една изгубена година за раст. Малото подобрување на деловното расположение дава дополнителна надеж дека најлошото можеби е зад нас и БДП ќе продолжи да расте во наредните квартали“.
—Мартин Адемер, економист
Додека посилниот економски раст годинава е благодат за претседателот Емануел Макрон, податоците покажуваат дека инвестициите паднале за 0,8 отсто. Одделни податоци покажаа дека растот на потрошувачката на домаќинствата забавил во септември. Постојаната слабост во тие области е клучен фактор зад падот на даночните приходи, кои дополнително ги напрегаат јавните финансии.
Пошироките последици од тој притисок стануваат очигледни. Довербата на потрошувачите месецов неочекувано падна за првпат од април, при што домаќинствата се попесимитични за идниот животен стандард, а невработеноста станува поголема грижа.
.webp){kind=icon}
Во моментов нема коментари за веста. Биди прв да коментира...