Германската стратегија за „отклучување“ на буџетот ги јакне европските пазари

Историскиот план на Германија за зголемување на трошоците ги потресе европските пазари во средата, поместувајќи ги акциите на ниво над американските пандани и враќајќи го еврото од работ на паритет со доларот.

Инвеститорите го поздравија историскиот момент за најголемата европска економија и вечниот заговорник на строги буџети, откако идниот канцелар Фридрих Мерц изјави дека Германија ќе направи „сè што е потребно“ за да се одбрани и вети дека ќе ги олесни ограничувањата за државната потрошувачка.

Германскиот референтен индекс на акции порасна за 3,4 отсто, што беше најголем дневен скок од 2022 година. Тоа, исто така, го подигна паневропскиот индекс Stoxx 600 на речиси рекордно ниво.

Приносите на референтните десетгодишни германски обврзници пораснаа за 30 базични поени, што е најмногу од периодот кога инвеститорите се подготвуваа за повторно обединување на Германија, по падот на Берлинскиот ѕид. Трговците се обложуваа на значителни добивки за еврото, само неколку недели откако единствената валута се приближуваше до доларот.

 

„Она што го гледаме од Германија можеме да го припишеме на европскиот инвестициски план“, рече Лора Купер, шефица на одделот за макрокредити и стратег за глобални инвестиции во „Нувин“ (Nuveen). „Пазарите, потенцијално, недоволно го проценуваат обемот на она што ќе го видиме во фискалниот план“.

„Нувин“ сега предвидува дека приносите на десетгодишните германски обврзници ќе пораснат на три отсто до средината на годината, во споредба со 2,2 отсто пред најавата (на Германија). Новата стратегија на таа земја, која „отклучува“ стотици милијарди евра за сообраќај, енергија и домување, претставува драстичен пресврт што ги руши границите на германската контрола врз задолжувањето. Ова потсетува на говорот на поранешниот шеф на Европската централна банка (ЕЦБ) Марио Драги од 2012 година, кога зборуваше за спасување на еврото.

Германија, исто така, ја повикува Европската унија (ЕУ) да ги реформира своите фискални правила, според лица запознаени со преговорите. Најголемата европска економија наводно бара од ЕУ да им дозволи на земјите да ги зголемат трошоците за одбрана, без да ги прекршат буџетските правила на блокот, имајќи ги предвид геополитичките околности. Се очекува лидерите на ЕУ да ги разгледаат можните промени на фискалните правила кога ќе се состанат в четврток.

„Големо, храбро, изненадувачко - пресвртница за состојбата на пазарите“, смета Евелин Херман, економист за Европа во Банка на Америка (Bank of America Corp.), коментирајќи го германското соопштение. Тоа претставува „вистински пресврт“.

Bloomberg

 

Стратегот на Дојче банк (Deutsche Bank AG), Максимилијан Улер - вечен оптимист во врска со европските акции - рече дека блокот сега го доживува својот момент „Да ја направиме Европа повторно голема“ (англ. Make Europe Great Again), што е игра на зборови поврзана со слоганот на кампањата на американскиот претседател Доналд Трамп (англ. Make America Great Again).

Улер повторно го нагласи својот позитивен став кон европските акции, велејќи дека германскиот предлог е „дури и над позитивните очекувања на стратезите“.

Што велат стратезите на „Блумберг“ (Bloomberg)... 

„Кога државата знае дека ќе ја изгуби својата клучна безбедносна гаранција, тоа ѝ го изострува умот. Германија ја отфрли својата самонаметната фискална ригидност и планира да прифати задолжување во обем кој претходно не го разгледувала.“

- Сајмон Вајт, макростратег на MLIVE

 

Акциите насочени кон германската економија скокнаа, при што германскиот индекс MDAX порасна за 6,2 отсто, што е негов најголем скок од март 2022 година.

Градежните фирми како „Билфингер“ (Bilfinger SE) и „Хохтиф“ (Hochtief AG) беа меѓу најголемите добитници во средата, со раст од 18, односно 16 отсто (по тој редослед). Одбранбените компании, како „Рајнметал“ (Rheinmetall AG), придонесоа за извонредниот скок оваа година, додека фирмите како Дојче банк и „Сименс“ (Siemens AG) пораснаа за повеќе од осум отсто.

„Во Германија постои многу силна динамика“, рече Фредерик Сури, заменик шеф на секторот за акции во „Парибас“ (BNP Paribas Asset Management), кој ја намали својата позиција поврзана со американските акции, во корист на Европа. „Сведоци сме на ширење, особено кај акциите на компании со среден капитал (mid-cap)“.

Depositphotos

 

Референтниот индекс Stoxx 600 е на пат да го надмине S&P 500 на квартална основа во последната деценија. Осум од десетте најдобри акции оваа година во рамките на MSCI World Index - референтниот индекс за развиените земји - сега се европски акции, покажуваат податоците собрани од „Блумберг“. Меѓу нив се одбранбените компании „Рајнметал“, „Талес“ (Thales SA), „Ленардо“ (Leonardo SpA) и „Сааб“ (Saab AB).

На пазарот на обврзници, перспективата за поголеми владини издвојувања во Европа претставува знак за тревога. Приносите на десетгодишните германски обврзници пораснаа за дури 31 базичен поен, достигнувајќи 2,80 отсто. Трошоците за задолжување на Германија сè уште се најниски во регионот, имајќи ги предвид нејзините историски лимити за потрошувачка. Инвеститорите, исто така, продаваа други европски обврзници, што доведе до раст на приносите во Италија, Франција и Велика Британија - земји кои последниве години трпеа притисок од пазарот поради фискалната потрошувачка.

Дополнителната фискална потрошувачка може да значи помала потреба за поттикнување на монетарната политика. Трговците ги намалија облозите кои се однесуваат на намалување на каматните стапки на ЕЦБ - на околу 67 базични поени до крајот на годината, во споредба со дури 90 базични поени, колку што прогнозираа на почетокот на неделата.

„Имаше многу грижи во врска со фискализацијата во САД, Велика Британија и на пазарите во развој, но тоа досега не беше случај во Европа“, рече Габриеле Фоа, портфолио менаџер во АИ (Algebris Investments). „Таа голема сигурност што пазарот ја има во врска со намалувањата на каматните стапки на ЕЦБ може да биде доведена во прашање.“

Оваа промена на динамиката може потенцијално да го прекине повеќегодишниот пораст на американскиот долар, според Џулијан Вајс, шеф на глобалното тргување со опции на валутните пазари на Групата 10 во Банка на Америка.

Банките, вклучувајќи ја и „Голдман Сакс“ (Goldman Sachs Group Inc.), повеќе не предвидуваат пад на еврото и негово изедначување со доларот. Наместо тоа, некои хеџ-фондови сега купуваат опции, обложувајќи се дека еврото ќе порасне уште 12 отсто до ниво од 1,20 долари во период од шест до девет месеци, според трговците запознаени со трансакциите.

„Ова е Мерцовиот 'Момент на вистината'“, рече Катлин Брукс, директорка на истражување во XTB. „Силно закрепнување на еврото сугерира дека европската ѕвезда сè посилно сјае“.

Во моментов нема коментари за веста. Биди прв да коментира...

Остави коментар