Пад на економската активност во Франција

Производството во Франција се намали за прв пат по период од една и пол година. Се смета дека ваквите резултати се пресликување на трендот од Германија, како најсилна економија во Европа, која подлегнува на инфлацијата и врз која што се одразува зголемата неизвесност од војната во Украина.

Индексот S&P Global, кој што претставува мерач на активноста на францускиот приватен сектор, падна во август на најниско ниво од почетокот на 2021 година, кога економската активност беше нарушена поради пандемијата. Индексот падна повеќе отколку што очекуваа аналитичарите.

Новите нарачки се намалени и кај производите и кај услугите, што ја намали сигурноста и довербата кај фирмите.

„Високата инфлација и намалениот интензитет на раст на побарувачката по Ковид кризата ги наведоа бизнисите и потрошувачите да ги намалат своите трошоци. Се чини дека европските економии се пред голем предизвик до крајот на годинава“, вели Џо Хејс, економист во S&P Global.

Според аналитичарите од Блумберг, рецесијата во еврозоната, која брои 19 земји членки, сега е поверојатна бидејќи трошоците за енергија значајно се зголемуваат по нападот на Русија врз Украина. Континентот, кој има голема предност и придобивки од воведувањето заедничка валута, сега се подготвува за натамошни зголемувања на каматните стапки. Минатиот месец Европската централна банка веќе ги зголеми трошоците за задолжување за прв пат од 2011 година.

Поради тоа што Германија најмногу од сите европски земји се потпира на Кремљ во врска со снабдувањето со природен гас и сега се соочува со недостиг од тој енергенс за следната зима, веќе има намалено производство два месеци по ред, во јули и август.

„Европската економија број еден бележи продлабочен пад на деловната активност во приватниот сектор“, вели Фил Смит, економист од S&P Global Market Intelligence, опишувајќи ја перспективата како „исполнета со несигурност“.

Во моментов нема коментари за веста. Биди прв да коментира...

Остави коментар