Инфлацијата во Франција забави над очекувањата, намалувајќи го притисокот врз Европската Централна Банка која се соочува со повици за поагресивно делување. Потрошувачките цени во втората најголема економија во еврозоната во август пораснаа за 6,5 отсто во однос на минатата година. Стапката на инфлација во јули изнесуваше 6,8 отсто. Тоа е поголемо забавување од просечната проценка од 6,7 отсто што ја дадоа економистите на Блумберг во анкетата.
Bloomberg
Нешто послабиот раст на цените на енергенсите ја намали стапката на инфлација, иако цените на услугите растат со исто темпо како и минатиот месец, додека трошоцте за храна и индустриски производи се забрзани.
Иако овие податоци можат да понудат мало олеснување на креаторите на политиките во ЕЦБ, сепак сите очи сега ќе бидат вперени во бројките за инфлацијата во 19 – члената еврозона кои би требало да бидат објавени денеска. Се очекува рекордна вредност, а податоците за Германија објавени вчера покажуваат сличен тренд.
Ситуацијата ги поттикна некои од челниците во ЕЦБ да предложат зголемување на каматните стапки за високи 75 базни поени, по зголемување од половина поен минатиот месец. Состанокот треба да се одржи следната недела. Други од челниците пак, како Philip Lane, се повнимателни. Тој повикува на пристап чекор по чекор за да им се овозможи на домаќинствата и бизнисите да се прилагодат.
Во Франција постојаниот притисок врз цените е главоболка за Владата која веќе потроши десетици милијарди евра за да го ублажи ударот врз домаќинствата.
Со оглед на тоа дека ограничувањето на цените на струјата и гасот истекува до крајот на годината, Франција работи на мерки за помош на фирмите за ублажување на влијанието од зголемените сметки.
Посебниот извештај за јули покажа дека домаќинствата веќе го намалиле трошењето заради растот на цените. Потрошувачката паднала за 0,8 отсто во однос на јуни, што е побрзо од очекувањата на економистите.
.webp){kind=icon}
