Трас со план од 130 милијарди фунти за замрзнување на сметките за струја

Новата британска премиерка, Лиз Трас, подготви планови за стабилизирање на годишните сметки за струја и гас, за просечно домаќинство во Велика Британија, на или под сегашното ниво од 1.971 фунти (2.300 американски долари).

Во разговори со нејзиниот тим и владини претставници во последните денови, Трас се решила за механизам што ќе го спречи масовното зголемување на сметките за енергија што, според постоечкиот систем на цени, требаше да започне на почетокот на следниот месец, велат официјални лица и советници на Трас кои биле информирани за планот. Мерката би можела да чини дури 130 милијарди фунти во следните 18 месеци, според политичките документи во кои Bloomberg имал увид.

Сметките за енергија во Обединетото Кралство од октомври требаше да скокнат за 80 отсто, на 3.548 фунти годишно за просечното домаќинство, принудувајќи многу посиромашни семејства да избираат помеѓу греењето на своите домови и други основни работи. Според плановите изготвени од тимот на Трас, тој режим на цени ефективно ќе биде укинат и енергетскиот регулатор Ofgem ќе биде ставен настрана.

Трас денеска треба да отпатува во замокот Балморал во Шкотска за да се сретне со кралицата Елизабета Втора пред официјално да ја преземе функцијата наследник на Борис Џонсон како британски премиер. Таа е под притисок да излезе со решение за зголемените цени на енергијата што ги уништува семејствата и бизнисите во ОК, бидејќи Русија го прекина снабдувањето со гас за Европа како одговор на санкциите воведени по нејзината инвазија на Украина.

Според планот на Трас, снабдувачите со енергија ќе бидат обврзани да им наплаќаат на домаќинствата намалена стапка за нивната енергија, а владата ќе гарантира финансирање што ќе ја покрие разликата до она што тие би го наплаќале според претходниот систем, стои во документите во кои Bloomberg имал увид.

Џејкоб Рис-Мог, кој треба да стане бизнис секретар во владата на Трас, во понеделникот разговарал со извршните директори на енергетските компании за да ги објасни плановите. Компаниите биле приемчиви за идејата, која воедно значи дека ќе избегнат неочекуван данок, а недостигот во нивниот приход ќе биде покриен од даночните обврзници, посочил извор кој бил присутен на состанокот.

За време на кампањата, Трас веќе вети дека ќе ја отстрани зелената давачка од околу 150 фунти годишно од сметките, додека претходната администрација вети уште 400 фунти владини субвенции за помош на семејствата. Додадено заедно со новиот пакет помош, едно просечно домаќинство може да биде сигурно во ефективно замрзнување на нивните сметки за енергија, истакнаа официјални лица.

Во моментов нема коментари за веста. Биди прв да коментира...

Остави коментар