.webp){kind=icon}
Стапката на инфлација во Данска го достигна највисокото ниво во последните четири децении, бидејќи цените на храната и енергијата се зголемуваат, што се заканува да го запре економскиот раст во оваа нордиска земја.
Во август, индексот на потрошувачките цени скокна за 8,9 отсто во споредба со претходната година, што е најбрзо темпо од почетокот на 1983 година, објави денеска данскиот институт за статистика од Копенхаген. Во јули таа изнесуваше 8,7 отсто.
Стапката на инфлација во Данска достигна највисоко ниво во последните четири децении / Bloomberg
„Инфлацијата е Ахиловата пета и на данската и на европската економија“, порача во белешка Матијас Долеруп Спрогел, висок економист во Sydbank. Сегашните цени значат дека просечното данско семејство ќе мора да троши дополнителни 40.000 круни (5.400 американски долари) годишно на стоки за широка потрошувачка, во споредба со 2021 година, објасни тој.
Пред две недели, данската влада ја намали прогнозата за економски раст за оваа и следната година, бидејќи зголемената инфлација ја еродира потрошувачката моќ и му штети на пазарот на трудот. Стапката на инфлација веројатно ќе се зголеми до 7,3 проценти во просек оваа година, а потоа ќе забави до 3,3 проценти во 2023 година, според Министерството за финансии.
Базичната стапка на инфлација, која ги исклучува ефектите од цената на енергијата, се зголеми на шест отсто во август од 5,5 отсто претходниот месец.
„Инфлацијата предизвикува кревка ситуација и лесно може да видиме дополнителни зголемувања“, порача во белешка Џепе Јул Боре, главен економист во Arbejdernes Landsbank.
Во предлог-буџетот за следната година, владата издвои две милијарди круни за помош за да се спротивстави на ефектите од забрзаната инфлација. Веќе оваа година, таа им додели помош од 2,4 милијарди круни на Данците со ниски приходи погодени од повисоките трошоци за греење и го ограничи зголемувањето на киријата.
