.webp){kind=icon}
Според Европската централна банка (ЕЦБ), очекувањата на потрошувачите за инфлацијата во еврозоната се намалиле во февруари, што ги зголеми надежите дека растот на цените дополнително ќе се намали во наредните месеци.
Цените би требало да се зголемат за 3,1 отсто во следните 12 месеци, што е намалување од 3,3 отсто во јануари, објави во вторникот ЕЦБ. Ова е најниско ниво од почетокот на војната во Украина во февруари 2022 година. За три години се очекува раст од 2,5 отсто, што е непроменето мислење во однос на претходниот месец.
Истражувањето доаѓа додека регулаторите се подготвуваат да ја намалат нивната депозитна стапка од рекордни четири проценти, што се очекува дека ќе се случи во јуни. Тие се надеваат дека тогаш ќе имаат поголема увереност дека инфлацијата секако е на пат до посакуваното ниво од два процента. Појасна слика за ситуацијата се очекува откако официјалните лица ќе се сретнат во Франкфурт следната недела за да ја одредат политиката.
Во меѓувреме, „Евростат“ в среда ќе ги објави податоците за инфлацијата на потрошувачките цени во 20-члената еврозона за март. Аналитичарите анкетирани од „Блумберг“ очекуваат инфлацијата дополнително да се ублажи, поточно на 2,5 проценти. Минатонеделните податоци за цените од Франција и од Италија беа пониски од очекуваното.
Истражувањето на Европската централна банка покажува дека потрошувачите имаат мал оптимизам за економијата, очекувајќи пад од 1,1 отсто во следните 12 месеци, исто како и еден месец претходно.
Според истото истражување, очекувањата на потрошувачите за стапката на невработеност во следните 12 месеци остануваат на 10,9 отсто. Исто така, се очекува раст на номиналните приходи од 1,4 отсто, што е мал пораст во однос на 1,2 отсто забележани во јануари.
Што се однесува на пазарот на домување, потрошувачите очекуваат вредноста на нивните домови да се зголеми за 2,4 отсто, што е малку повеќе од 2,2 отсто во јануари. Се очекува каматните стапки на хипотеките да останат непроменети, на 5,1 отсто.
