Шведска ги советува граѓаните да чуваат готовина во случај на војна или криза

Сите возрасни Швеѓани треба да чуваат готовина за една недела дома за да можат да купат храна, лекови и други основни потреби во случај на војна или друга криза, соопшти централната банка на Шведска.

Покрај 1.000 круни (110 долари) по возрасен, Швеѓаните треба да чуваат и банкарски картички од повеќе заемодаватели и да ја користат локалната услуга за онлајн плаќање „Швиш“ (Swish), соопшти „Риксбанк“ во средата во своите први упатства за плаќања насочени директно кон граѓаните.

 

„Јавноста е важен дел од вкупната одбрана на Шведска и е од клучно значење за зајакнување на националната подготвеност“, соопшти централната банка. „Имањето пристап до различни методи на плаќање ја подобрува способноста на јавноста да врши плаќања во случај на привремени прекини, кризи и, во најлош случај, војна.“

Препораките се најновиот напор на шведските власти да го подготват општеството за ефектите од воен или сајбер напад во услови на зголемени закани од блиска Русија и во помала мера од Иран. Владата веќе испрати брошура до секој дом во која им кажува на Швеѓаните, меѓу другото, колку вода за пиење треба да складираат и како можат да пристапат до вести за време на прекин на електричната енергија.

Шведскиот платен систем се смета за особено ранлив бидејќи е високо дигитализиран, со само околу едно од десет плаќања извршено со готовина.

„Риксбанк“ побара нов закон за заштита на статусот на готовината, но такво законодавство сè уште не е воведено. „Риксбанк“ сооопшти дека офлајн плаќањата со картички за храна и лекови треба да им бидат достапни на граѓаните во случај на нарушување на системот до 1 јули.

Централните банки на Финска и Норвешка, обете гранични држави со Русија, веќе издадоа упатства до своите граѓани за чување готовина и повеќе од една банкарска картичка.