Европа воведува стандард еуро 7, Македонија вози на еуро 4

Од крајот на ноември годинава стапува во сила стандардот еуро 7 за автомобилите и комбињата. Основната цел на новите правила на Европската Унија е дополнително намалување на дозволените емисии на штетни гасови и честички од возилата.

Главната разлика на овој од претходните стандарди е тоа што мерењата ќе се вршат во реални услови на возење. Сите претходни стандарди се развиваа за да се намали негативното влијание врз животната средина, но во практика возилата емитуваат многу повеќе штетни честички отколку што покажуваа мерењата во лабораторија.

Целта на еуро 7 е токму тоа - да нема разлика во издувните гасови при мерење во контролирани лабораториски услови и при секојдневно возење. Според новите норми, на негативните емисии не смее да има влијание стилот на возење, температурата или оптоварувањето на возилото.

За да се постигне тоа, стандардот еуро 7 се однесува не само на моторот како досега туку на возилото во целост. Сега ќе се мерат и емисиите што доаѓаат од трошењето на гумите и сопирачките, а не само гасовите што излегуваат од ауспухот.

Зошто се важни гумите и кочниците?

Емисиите што произлегуваат од трошењето на гумите од сопирачките досега не беа дел од стандардите еуро и затоа ова е најзначајната новина во правилата.

Анализите покажуваат дека при трошењето на сопирачките се ослободуваат ситни честички во воздухот што влијаат на здравјето на луѓето. Истото тоа се случува и при трошењето на гумите, од кои се ослободуваат штетни емисии што завршуваат во воздухот, почвата и водата.

Ваквите правила ќе имаат влијание на производителите на нови возила затоа што тие ќе мора да работат на развој на нови материјали и технологии, што на крајот ќе има влијание и врз цените.

Времетраењето на правилата - уште една клучна разлика

За разлика од стандардот еуро 6, кој главно е фокусиран на издувните гасови на новите автомобили, еуро 7 ќе важи подолго време по купувањето на автомобилот.

Друга разлика со нормите на еуро 6 е тоа што сега правилата се исти и за бензинските и за дизелските мотори. Досега за бензинските мотори стандардите за емисиите на азотни оксиди беа полабави, а еуро 7 предвидува исти лимити за двата типа мотори.

Еуро 7 ќе го смени и дизајнот на моторите, затоа што ќе треба да се намали работната зафатнина на моторите, и ќе наложи примена на повеќе хибридни решенија за полесно исполнување на строгите барања.

Ќе важи и за хибридите и за електричните возила

Но и хибридите ќе подлежат на новите правила. Тие се преодно решение кон целосна електрификација, но сѐ уште користат мотор со внатрешно согорување, кој често се вклучува и исклучува, најмногу при возење низ град, што доведува до зголемени емисии. Новиот стандард бара и хибридите да ги исполнуваат строгите лимити за емисии, без оглед на тоа колку често моторот се вклучува и исклучува. Исто така, и контролата на емисиите ќе трае подолго време.

Електричните возила немаат издувни гасови, но за првпат не се изземени од правилатана еуро 7. Овие возила се потешки од другите поради батериите и токму затоа кај нив трошењето на гумите и сопирачките е почесто, што резултира со поголема емисија на штетни честички во воздухот, што е опфатено со новите правила.

 

Во Македонија и натаму може да се увезуваат возила со еуро 4

Додека новите европски правила ќе важат од 29 ноември за лесните возила, а за автобусите и камионите од 2027 година, во земјава продолжува увозот на возила според стандардот еуро 4. Единствената разлика е што при увоз на вакви возила давачките се повисоки.

Како резултат на лабавата политика во земјава се увезуваат четири половни на едно ново патничко возило.

Статистиката покажува дека увозот на употребувани автомобили во изминатиот период ја зголемува просечната старост на возниот парк во Македонија. Лани просечна старост на автомобилите во Македонија била 19,4 години, а најголем дел патнички автомобили регистрирани во земјава се произведени до 2010 година односно се возила со еуро 4 или пониски стандарди.