.webp){kind=icon}
Неизвесна зима претстои за бизнис секторот, при што и малите и големите фирми се на удар поради непредвидливоста на цената на струјата.
Претседателката на Текстилниот кластер, Маријана Перковска, во гостувањето на Блумберг Адрија ТВ посочи дека во моментот веќе има две компании што ги затвориле своите погони.
„Има најави и од други компании кои навестуваат дека доколку не се интервенира од страна на државата во делот на цената на електричната енергија, нема да можат да ги поднесат трошоците за струја кои се зголемени за десет пати“, посочи Перковска.
Претседателката на Текстилниот кластер истакна дека има и компании со поставени фотоволтаици, но, како што рече, поради недоискажаност во процедурите немаат никакви привилегии во моментите кога нема доволно електрична енергија и треба да се јават на слободниот пазар.
„Се надеваме дека Владата многу побрзо ќе сака да ги реши тие проблеми, но сè е некако во исчекување, времето ги гази компаниите, а знаете дека пазарите се немилосрдни и странските добавувачи не толерираат енормно поскапување на цените на услугите и производите“, нагласи Перковска според која текстилната индустрија во моментот се соочува со многу големи проблеми.
Целиот разговор со претседателката на Текстилниот кластер погледнете го во видеото прикачено во рамки на објавата.
